Зәйдә вакыт капсуласын салдылар
20 мартта Зәйдә мөһим вакыйга булды – киләчәк буыннарга 10 елга юллама белән «Вакыт капсуласы» салынды. Аны 10 елдан соң Бөек Җиңүнең 90 еллыгы уңаеннан киләчәк буыннар алып укыячак. «Вакыт капсуласы» акциясен Зәйнең туган як тарихын өйрәнү музее хезмәткәрләре оештырды. Бу хакта «Зәй яңалыклары» сайтында хәбәр ителә.
Акция кысаларында Бөек Ватан, әфган, чечен сугышлары ветераннары, концлагерь тоткыннары, махсус хәрби операциядә катнашучылар киләчәк буынга хат – юллама язып, аны капсулага салды.
«Вакыт капсуласы» - бу тарихи хәтерне саклау һәм буыннар арасында дәвамчанлыкны формалаштыру.
20 мартта музейда узган чарада әфган, чечен сугышы һәм махсус хәрби операция ветераннары катнашты. Алар белән очрашуга 1нче мәктәпнең III, VII сыйныф укучылары килде. Чарада шәһәр башлыгы урынбасары Сергей Максимов катнашып, чыгыш ясады.
«Без бу вакыт капсуласын 2035 елның 8 маенда Бөек Җиңүнең 90 еллыгын һәм безнең музейның ярты гасырлык юбилеен билгеләп үткәндә ачачакбыз. Безнең бабаларыбыз зур сынаулар аша үткәннәр һәм барлык авырлыкларны җиңеп чыкканнар. Буыннарны бәйләүче тере җеп өзелмәсен иде», - диде музейның кече фәнни хезмәткәре Алсу Шаһабиева.
Хөрмәтле кунаклар киләчәк буыннарга теләкләрен җиткереп хат язды һәм аны капсулага салды.
Вакыт капсуласын салу хокукы районыбызның иң яшь вәкилләре – Әмир Габдуллин, Илзирә Ждановага бирелде. Юллама белән капсула саклагычка урнаштырылды.