600 млн теңгеге алаяқтық жасаған: Алматы облысында күдіктілер ұсталды
Алматы облысында Telegram арқылы алаяқтықпен айналысқан қылмыстық схеманың ұйымдастырушысы мен төрт қатысушысы ұсталды, - деп хабарлайды Tengrinews.kz тілшісі.
Тергеу барысында ұсталған куратор 2024 жылғы маусымнан бастап 50-ден аса дропты (банк карталарын өз атына немесе басқа адамдардың атына рәсімдеген тұлғаларды) басқарғаны анықталды. Осы шоттар арқылы 1000-нан аса қаржылық операция жүргізіліп, жалпы сомасы 580 миллион теңгеден асқан. Әрбір транзакциядан куратор 6% комиссия алып, жалпы табысы 35 миллион теңгеден асқан.
"Дроптарға қатысты қылмыстық істер елдің бірнеше өңірінде, соның ішінде Алматы облысының Қарасай және Еңбекшіқазақ аудандарында, сондай-ақ, Алматы, Шымкент, Қызылорда қалаларында және Маңғыстау облысында тергеліп жатыр", - деді полиция.
Айта кетейік, куратор Telegram арқылы "оңай ақша табу" туралы хабарландырулар жариялап, дроптарды тартумен айналысқан. Ол адамдарды банк карталарын өз атына немесе басқа тұлғалардың атына рәсімдеуге көндірген. Алаяқтар карталарға қол жеткізгеннен кейін оларды жәбірленушілерден алаяқтық жолмен алған ақшаны аудару және ізін жасыру үшін пайдаланған. Түскен ақша тез арада қолма-қол шешіліп, криптовалютаға аударылып немесе басқа есепшоттарға таратылып отырған.
Куратор әрбір транзакциядан 6% пайда көрсе, дроптарға аз ғана сыйақы төленген, ал негізгі табыс қылмыстық схеманы ұйымдастырушыларға кеткен. Нәтижесінде дроптардың карталары заңсыз операцияларға қолданылған, ал куратор мен ұйымдастырушылар жасырын әрекет еткен.
"Қазір күдіктілер полицияға жеткізілді, тергеу жүргізіліп жатыр. Куратор уақытша ұстау изоляторына қамалды", – деді ведомство өкілі.
Құқық қорғау органдары азаматтарды сақ болуға және банк деректерін бөгде адамдарға бермеуге шақырады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!