Мыңдаған ақбөкеннің өлексесі: Экология министрлігі видеоға қатысты пікір білдірді
Ведомство мәліметінше, ең көп жағдай ақбөкендердің табиғи мекендеу ортасында байқалған: Ұлытау, Қарағанды, Қызылорда, Атырау және Батыс Қазақстан облыстарында.
"Ақбөкендердің биологиясы мен өмірлік циклін ескере отырып, бұл жағдайлар табиғи өлім-жітімге байланысты", – деп мәлімдеді Экология министрлігі.
Мамандандырылған ведомство мәліметінше, қолданыстағы алгоритмге сәйкес жануарлардың өлекселері жойылуы керек.
"Жұмыстарды Орман шаруашылығы және жануарлар дүниесі комитетінің аумақтық және ведомстволық бөлімшелері әкімдіктер, ветеринарлық қызмет, полиция және ТЖМ қызметкерлерімен бірлесіп жүргізіп жатыр. Барлығы 150-ден астам адам жұмылдырылды. 51 техника тартылды. Жыл басынан бері 5,2 мыңнан астам өлексе жойылды", – деп хабарлады министрлік.
Зоология институтының териология зертханасының меңгерушісі А. Грачевтің айтуынша, қалыпты жағдайда барлық жас топтарындағы ақбөкендердің табиғи өлім-жітімі жылына шамамен 20 пайыз болады. Сонымен қатар, аталықтарының жартысына жуығы өліп кетуі мүмкін.
"Ақбөкен – өмір сүру ұзақтығы қысқа және көбею қарқыны жоғары дала жануары. Қатал қыстарда аөбөкендердің саны 40-50 пайызға дейін азаюы мүмкін. Қыста жануарлар қалың қар жауған кезде және жайылым шектелгенде, май қорын жоғалтады. Қазақстанның шөл және шөлейт аймақтарында мұндай табиғи құбылыстар жиі кездеседі, бұл әлсіреген кейбір ақбөкендердің қырылуына алып келеді", – деді Экология министрлігі маманның сөзін келтіре отырып.
Сілтемесіз жаңалық оқисыз ба? Онда Telegram желісінде парақшамызға тіркеліңіз!