Россия социаль фондының Татарстан бүлеге апрельдә пенсияләрне индексацияләү турында әйтте

Россия социаль фондының Татарстан бүлеге 1 апрельдән пенсияләрне (шул исәптән социаль пенсияләрне) дәүләт тәэминаты нигезендә 14,75 процентка индексацияләячәк. Бу төбәктә яшәүче 85 меңнән артык кешегә кагылачак, дип хәбәр иттеләр бүген Россия социаль фондының Татарстан бүлеге матбугат хезмәтендә.

«Бу быел акчалата түләүләрне беренче тапкыр гына арттыру түгел. Гыйнварда эшләүчеләр өчен дә, эшләмәүчеләр өчен дә иминият пенсияләре 7,3 процентка индексацияләнде. Аннары февральдә 9,5 процентка кадәр янәдән индексацияләү уздырылды. Апрельдә социаль һәм дәүләт пенсияләре 14,75 процентка артачак, ә августта эшләүче пенсионерларның пенсияләрен яңадан исәпләү көтелә», - дип сөйләделәр «Татар-информ»га матбугат хезмәтендә.

Индексацияләү күләме пенсионерларның узган елдагы яшәү минимумының үсеш темпларыннан чыгып исәпләнә. Социаль пенсия хезмәт стажы булмаган яки ул иминият пенсиясен билгеләү өчен җитәрлек дәрәҗәдә булмаган кешеләргә түләнә. Моннан тыш, бу төр түләү инвалидларга һәм туендыручысын югалткан кешеләргә каралган.

«1 апрельдә 85 200 татарстанлының пенсияләре индексацияләнәчәк. Арттырылган пенсияләр элеккеге график буенча киләчәк. Россия Социаль фондының Татарстан Республикасы бүлеге пенсияләрне яңадан исәпләүне проактив режимда үткәрәчәк, ягъни гражданнарга бернинди гаризалар да бирергә кирәкми», – дип аңлатты Россия Социаль фондының Татарстан бүлеге идарәчесе Эдуард Вафин.

Социаль пенсияләр белән беррәттән гражданнарның түбәндәге категорияләре өчен пенсия түләүләре индексацияләнәчәк:

• Бөек Ватан сугышында катнашучылар;
• «Блокадалы Ленинградта яшәүчегә», «Камалыштагы Севастопольдә яшәүче» яки «Камалыштагы Сталинградта яшәүче» мактаулы билгеләре белән бүләкләнгән гражданнар;
• чакыру нигезендә хәрби хезмәт узучы хәрбиләр һәм аларның хезмәткә сәләтсез гаилә әгъзалары;
• радиация йогынтысына дучар булган гражданнар һәм аларның хезмәткә сәләтсез гаилә әгъзалары;
• космонавтлар һәм очучы-сынаучылар.