Израиль Ливандан атылган ракеталарга жооп катары Бейрутту бутага алды
Израил армиясы 28-мартта Ливандын аймагынан атылган ракеталарга жооп катары Бейрут баш калаасына абадан сокку урду.
Мындай чабуулдар былтыр ноябрда Израил менен Иранга ыктаган шиилердин "Хезболла" тобунун ортосунда ок атышууну токтотуу макулдашуусу күчүнө киргенден бери экинчи ирет болуп жатат.
"Хезболла" эки жолу тең өзүнүн тиешеси жок экенин билдирди. Аталган топ Израил жана АКШ тарабынан террордук уюм катары таанылган. Евробиримдик анын аскердик канатын гана террордук деп эсептейт.
Израиль аскерлери Ливандын баш калаасынын түштүк тарабында жайгашкан Дахие районуна сокку урду. Ага чейин ЦАХАЛ жергиликтүү тургундарды коопсуз жактарга чыгып кетүүнү суранган эскертүү тарткаткан. Бул эскертүү калаада дүрбөлөң жаратып, ата-энелер балдарын мектептен алып кетүүгө шашылып, ал эми шаардан чыгып кетүүнү көздөгөндөрүн саны өтө көп болгондуктан кан жолдордо тыгындар жаралды.
Бул тууралуу "Франс-пресс" агенттигинин кабарчылары маалымдады.
Израил "Хезболланын Аэро 127 бөлүмүнө таандык дрондор сакталган объектти" бутага алганын билдирди. Маалыматка караганда, бул жай "Хезболланын" Бейруттагы негизги чептеринин бири катары саналчу.
Өткөн жылы Израиль менен "Хезболланын" ортосундагы согуш тутанганда Дахие району катуу бомбалоого туш болгон.
"Хезболланын" лидери Наим Кассем жума күнү Бейруттун түштүк бөлүгүндө сөз сүйлөшү керек болчу. Иш-чара белгилүү себептерден улам өтпөй калды.