Ришат хәзрәт Рамазан ае, яңа форматлы ифтарлар һәм замана чакырулары турында сөйләде
Татарстан мөфтиенең мәгълүмати сәясәт буенча урынбасары Ришат хәзрәт Хәмидуллин Рамазан аеның әһәмияте, ифтар традицияләрендәге үзгәрешләр, махсус хәрби операция зонасындагы хәрбиләргә ярдәм итү һәм дини җәмәгатьчелек алдында торган чакырулар турында сөйләде. Әлеге темаларга ул «Татарстан 24» телеканалына биргән интервьюда кагылды.
Беренче чиратта Ришат хәзрәт Ураза гаете бәйрәменең әһәмияте турында сөйләде. Хәмидуллин әйтүенчә, изге Рамазан аенда мөселманнар Аллаһ Тәгалә ризалыгы өчен ашау-эчүдән һәм башка ләззәтләрдән тыелып тора, дога кылуга һәм игелекле эшләр башкаруга күбрәк вакыт багышлый. Коръән укуга, эго белән көрәшүгә һәм үз-үзеңне камилләштерүгә аерым игътибар бирелә. Бу чор Ислам динендәге төп бәйрәмнәренең берсе – Ураза гаете белән тәмамлана.
Ришат хәзрәт билгеләп үткәнчә, дини йолаларны үтәү генә кешенең изге булуын гарантияләми, чөнки кеше һәр сайлауны һәрвакыт үзе ясый. Мисал итеп ул уллары көчле авариягә юлыкканнан соң Аллаһка дога белән мөрәҗәгать иткән танышларын китерде. Бу аларның дингә мөнәсәбәтен үзгәртте, дип сөйли хәзрәт.
Шулай ук мөфтиятнең махсус хәрби операция зонасындагы хәрбиләргә актив ярдәм итүе турында хәбәр ителде. Гуманитар йөкләр, шул исәптән хәләл продукция җибәрелә. Күптән түгел мобиль мәчетләр тапшырганнар. Хәрби хезмәткәрләрнең күбесе Рамазан аенда ураза тоткан, республика мөселманнары аларга авыз ачу өчен күчтәнәчләр җибәргән.
Fashion-ифтар һәм business-ифтар кебек заманча ифтар форматлары турында сөйләшкәндә, Ришат хәзрәт оештыручыларның нияте мөһим булуны ассызыклады. Әгәр чарадан кергән акчалар хәйриягә юнәлтелә икән, Диния нәзарәте мондый инициативаларны хуплый. Шул ук вакытта ул мәчетләрдә уза торган традицион ифтарлар шулай ук күп кеше катнаша торган күренеш булып кала, шулкадәр үк игътибар гына җәлеп итми, дип билгеләп үтте.
Мәчетләргә йөрүче яшьләр саны арта. Моны мөфти тормыш сорауларына җавап һәм рухилык эзләү белән бәйли. Ул ассызыклаганча, һәр кеше дингә үз юлы белән килә: кемдер шәхси фаҗигасе аша, кемдер китаплар һәм уйланулар нәтиҗәсендә.
Дини җәмәгатьчелекнең төп бурычлары буларак Ришат хәзрәт социаль проблемаларга каршы көрәшү, туучылар санын арттыру һәм кешеләрнең динилеген кайтаруны атады. Сүзен тәмамлап, ул барысына да Аллаһ Тәгаләнең мәрхәмәтен, сәламәтлек һәм тынычлык теләде.