Трамп “Олтин карта” дизайнини тақдим этди

Президент Доналд Трамп Қўшма Штатларда яшаш ҳуқуқини берувчи “олтин карта” қандай кўринишга эга бўлишини кўрсатди, деб Air Force One самолёти бортида журналистлар билан суҳбат чоғида маълум қилди.

«Биласизми, бу нима?» — деб сўради у ва картани кўрсатди. Кейин ўзи жавоб берди: «Бу олтин карта, Трампнинг картаси. Беш миллион доллар эвазига бу сизники бўлиши мумкин».

Карта банк картасидан бироз каттароқ бўлиб, устида Озодлик ҳайкали фонида Трампнинг портрети тасвирланган. Ўнг томонда “The Trump Card” деган ёзув ва президент имзоси жойлашган.

Трампнинг сўзларига кўра, бу карта икки ҳафта ичида сотувга чиқарилади.

Президент “олтин карта” дастурини февраль ойи охирида эълон қилганди. Бу дастур хорижликлар АҚШда яшаш ҳуқуқини олиш учун 1 миллион доллар сармоя талаб қилувчи EB-5 дастурини алмаштириши керак. Янги “олтин карта” доимий яшаш ҳуқуқини беради ва 5 миллион доллар (ҳозирги курс бўйича тахминан 615 миллиард сўм) эвазига АҚШ фуқаролигини олиш имконини яратади.

Трампнинг таъкидлашича, карталар савдосидан тушган маблағ АҚШ давлат бюджети тақчиллигини қоплашга йўналтирилиши мумкин. Янги виза талабгорлари текширувдан ўтади, аммо бу борада ҳозирча қўшимча маълумот берилмаган.