კრივოი-როგზე რუსული რაკეტით დარტყმის შედეგად დაჭრილთაგან ოცის მდგომარეობა მძიმეა

უკრაინის ქალაქ კრივოი-როგის საცხოვრებელ მიკრორაიონზე რუსული ბალისტიკური რაკეტით დარტყმის შედეგად დაჭრილებს შორის 20-ის მდგომარეობა ისევ მძიმეა.

ქალაქის თავდაცვის საბჭოს მდივნის, ოლექსანდრ ვილკულის თანახმად, 7 აპრილის დილის მონაცემებით, საავადმყოფოებში რჩება 33 დაშავებული, მათ შორის 4 ბავშვი. ვილკულის ინფორმაციით, პაციენტებიდან მძიმეა 2 ბავშვის და უფროსი ასაკის 18 პირის მდგომარეობა.

უკრაინის ხელისუფლების ცნობით, რუსეთის საოკუპაციო ძალებმა 4 აპრილს, საღამოს ბალისტიკური რაკეტით დაარტყეს კრივოი-როგის საცხოვრებელ მიკრორაიონს. სარაკეტო დარტყმას მოჰყვა ქალაქზე დრონებით შეტევაც.

დაიღუპა 20 ადამიანი, მათ შორის 9 ბავშვი. დაშავდა 60-ზე მეტი.

6 აპრილს, როცა უკრაინაში ეროვნული გლოვა იყო, აშშ-ის ელჩმა ბრიჯიტ ბრინკმა სოციალურ ქსელ X-ში უკრაინულ ენაზე გამოაქვეყნა განცხადება, რომ უკრაინელი ხალხისადმი სოლიდარობას გამოხატავენ კრივოი-როგზე რუსეთის სარაკეტო შეტევის შედეგად 20 ადამიანის, მათ შორის 9 ბავშვის დაღუპვის გამო.

4 აპრილს, კრივოი-როგის შესახებ გავრცელებულ პირველ განცხადებაში ბრინკს რუსეთი არ უხსენებია, რასაც ბევრი უკრაინელის მხრიდან მწვავე რეაქცია მოჰყვა. აშშ-ის ელჩი გააკრიტიკა პრეზიდენტმა ზელენსკიმაც.