Apple юк самолётлари орқали 1,5 миллион iPhone’ни АҚШга олиб ўтди
0
Нега шошилинч жўнатма?
Reuters маълумотига кўра, Apple март ойидан буён ҳар бири 100 тонна сиғимга эга олтита юк самолёти орқали маҳсулотларни олиб ўтмоқда. Улардан бири ҳатто янги божлар кучга киришидан бир неча кун олдин АҚШга етиб борган.
Бундай шошилинч ҳаракатлар компаниянинг 145% бож тўловларидан қутулиш учун амалга оширилгани айтилмоқда. Чунки Appleнинг асосий ишлаб чиқариш маркази Хитойда жойлашган бўлиб, айнан шу юртидан келадиган маҳсулотларга тарифлар кескин оширилди.
Apple’нинг “яшил коридори” — Ҳиндистонда ҳам ишга тушди
Apple компанияси Ҳиндистондаги Ченнай аэропортида махсус “яшил коридор” ташкил этишни сўраган. Натижада божхона расмийлаштируви муддати 30 соатдан 6 соатгача қисқартирилди. Бу усул Appleнинг Хитойдаги айрим логистика моделларига жуда ўхшайди.
Қанча смартфон олиб ўтилган?
Reuters ҳисоб-китобига кўра, қадоқланган iPhone 14 ва зарядловчи қурилмаси ўртача 350 граммни ташкил этади. Демак, 600 тонналик юк тахминан 1,5 миллион дона iPhone смартфонга тўғри келади.
Америка бозори учун кураш
Apple ҳар йили дунё бўйлаб 220 миллиондан ортиқ iPhone сотади. Counterpoint Research таҳлилларига кўра, ҳозирда АҚШда сотилаётган iPhone’ларнинг 20 фоизи Ҳиндистонда, қолганлари эса Хитойда ишлаб чиқарилган.
Бироқ божлар орқали юзага келган жиддий хавф компанияни логистика ва ишлаб чиқариш стратегиясини қайта кўриб чиқишга мажбур қилмоқда. Агар божлар сақланиб қолса, iPhone нархлари уч баробаргача қимматлашиши мумкин.
Apple шошилинч ва оқилона ҳаракатлар орқали нафақат божлардан қочишга, балки ўзининг энг муҳим бозорларидан бири — АҚШдаги позициясини сақлаб қолишга ҳаракат қилмоқда. Бу бир томондан логистикадаги юксак даражани, иккинчи томондан эса компаниянинг глобал сиёсий вазиятларга қанчалик тез мослаша олишини намоён этмоқда.