Быйыл 1-октябрдан тартып Кыргызстанда пенсияга 7% кошулат
Кыргызстанда пенсияга быйыл күзүндө да 7% кошулат. Бул тууралуу Социалдык фонддун төрагасы Бактияр Алиев 11-апрелде Жогорку Кеңештин "Ата Журт" фракциясынын отурумунда билдирди.
Анын сөзүнө караганда, былтыр октябрда пенсияга 7% кошулуп, бул үчүн 1,2 млрд сом акча сарпталган.
"Быйылкы жарым жылдыкта камсыздоо төлөмдөрүнүн суммасын карап көрөбүз. Пенсияны көбөйтүү ошого жараша болот. Балким 7% көбүрөөк да кошулуп калышы мүмкүн", - деди Алиев.
Соцфонд төрагасынын сөзүнө караганда, 2024-жылы камсыздандыруу төлөмдөрүнүн суммасы 73,72 млрд сомду түзгөн. Бул мурунку жылга караганда 9,115 млн сомго көп.
2024-жылдын 1-октябрынан тартып пенсиянын камсыздандыруу бөлүгү 18% жогорулап, эң аз пенсия 6900 сомго жеткирилген.
Расмий маалыматтарга караганда, Кыргызстанда пенсионерлердин саны жыл сайын 3-4% өсүп жатат.
11-апрелге карата маалымат боюнча, 779 миң пенсионер бар, алардын ичинен 800үнүн акчасы 50 миң сомдон жогору. (ZKo)