«Барселона» мухлислари финал олдидан Винисиусни ҳақорат қилди: вазият кескинлашмоқда

Бугун тун Испания кубоги финалида «Реал Мадрид» ҳамда «Барселона» жамоалари ўртасидаги супер тўқнашув бўлиб ўтади. Карло Анчелотти шогирдлари Ханс-Дитер Флик бошчилигидаги каталонияликларга қарши майдонга тушади. Аммо ўйин бошланишидан олдинёқ мухлислар ўртасида кескинлик ва зиддият авж олмоқда.

Маълум бўлишича, «Барселона» мухлислари ўйин олдидан шаҳар кўчаларида «Реал»нинг бразилиялик вингери Винисиус Жуниорга нисбатан оғир ҳақоратларни айтишган. Улар «Винисиус, ўл!» деб бақирган, шунингдек, уни «пляж тўпи» деб калака қилишган.

Қизиғи шундаки, «пляж тўпи» деган ҳақорат ўтган йилги воқеалар билан боғлиқ. Ўшанда Винисиус «Олтин тўп» учун овоз беришда иккинчи ўринни олган ва ўйинлардан бирида «Барселона» ярим ҳимоячиси Гавига тез орада ушбу мукофотни қўлга киритишини айтиб мақтанган эди. Лекин якунда Винисиус овоз бериш натижаларига кўра «Манчестер Сити» ва Испания термаси ўйинчиси Родридан ортда қолганди.

Ушбу ҳолат «Эл Класико» атрофидаги вазиятни янада кескинлаштирган. Ҳозирча жамоалар вакиллари ушбу воқеаларга расмий муносабат билдирганича йўқ, аммо мухлислар ўртасидаги бундай хатти-ҳаракатлар жиддий можарога айланиши мумкин.

Испания кубоги финали бугун кечаси Тошкент вақти билан 01:00 да бошланади. Икки буюк рақибнинг бу сафарги кураши ҳам қизғин ва кескин кечиши кутилмоқда.