Пепе "Барселона" – "Реал" тўқнашуви бўйича тахминини билдирди

Португалия терма жамоаси ҳамда Мадриднинг «Реал» клуби собиқ ҳимоячиси Пепе Испания Кубоги финали олдидан ўз тахмини билан ўртоқлашди. У ўзининг собиқ жамоаси бўлган мадридликларнинг ғалаба қозонишига ишонаётганини билдирди.

Карло Анчелотти бошқарувидаги «қаймоқранглилар» бугун кечаси ҳал қилувчи баҳсда ўзининг азалий рақиби «Барселона» билан рўбарў келади. Пепенинг сўзларига кўра, бу ўйинда «Реал»нинг ғалаба қозониши мумкинлигига шубҳа йўқ, лекин финал баҳси ўта мураккаб ва кескин кечиши аниқ.

«Мен «Реал»нинг бугунги ўйинда ғалаба қозонишига умид қиламан ва ишонаман. Аммо «Барселона»га қарши финалда ғалаба қозониш жуда осон бўлмайди. Ўйиннинг натижаси бўйича менинг тахминим – 2:0. Голларни эса Вальверде ва Рюдигер уради деб ўйлайман», — дея ўз тахминини айтди Пепе.

Эслатиб ўтамиз, бугун кечаси, 26 апрелдан 27 апрелга ўтар кеча Испания Кубогининг финал баҳси бўлиб ўтади. Дунё футболидаги энг машҳур тўқнашувлардан бири бўлган ушбу ўйин бутун футбол мухлисларини катта қизиқиш билан экрани қаршисида йиғади.