Лукашенко Ғалаба куни муносабати билан 8 минг маҳкумни қамоқдан озод этади

Беларусда Иккинчи жаҳон урушидаги Ғалабанинг 80 йиллиги муносабати билан тарихий аҳамиятга эга қарор қабул қилинди. Президент Александр Лукашенко бугунги кунда мамлакат қамоқхоналарида жазо ўтаётган минглаб шахсларни қамраб оладиган амнистия тўғрисидаги қонунни имзолади.

Беларус президентининг матбуот хизмати маълум қилишича, амнистия қарийб 8 минг маҳкумга тааллуқли бўлади. Ушбу тарихий қадам нафақат жабр кўрганлар учун, балки бутун жамият учун инсонпарварлик ва кечиримлилик рамзи сифатида баҳоланмоқда.

Амнистия асосан ижтимоий хавфи паст бўлган ёки ўта оғир бўлмаган жиноятлар учун жазо ўтаётган маҳкумларга тааллуқли бўлиб, уларнинг жазолари енгиллаштирилади ёки умуман бекор қилинади. Қонунга кўра, бу чора фақатgina етказилган зарарни тўлиқ қоплаган ҳамда жазо муддати давомида ижобий тавсияларга эга бўлган шахсларга нисбатан қўлланади.

Янги қонунга кўра, 70 ёшга тўлган, олти йилгача озодликдан маҳрум этилган ва аввал судланмаган фуқароларнинг жазоси “озодликни чеклаш” шаклига алмаштирилади. Шунингдек, эҳтиётсизлик билан инсон ўлимига сабаб бўлган жиноятларда жазо қисман – бир йилгача қисқартирилиши мумкин.

Беларус раҳбарининг ташаббуси шу билан чекланмади. Александр Лукашенко шунингдек, экстремизм билан боғлиқ жиноятлар учун жазо ўтаётган 42 нафар маҳкумни афв этди. Афв қилинганлар орасида сурункали касалликка дучорлар, ногиронлар ва вояга етмаган фарзандларга эга шахслар бор.

Мазкур қадам, президент администрацияси таърифича, “жамиятда инсонийлик, кечиримлилик ва социал адолатни таъминлаш сари ташланган муҳим қадамдир”.

Беларусдаги бу амнистия нафақат мамлакат ичида, балки халқаро миқёсда ҳам ижобий баҳоланиши кутилмоқда. Бу каби инсонпарвар ташаббуслар жазо тизимини ислоҳ қилиш, маҳкумларни жамиятга қайта мослаштириш ва профилактик чораларни кучайтиришда муҳим роль ўйнаши мумкин.