Ўзбекистонда ногиронликни аниқлаш бўйича янги тизим жорий этилмоқда
0
Президент Шавкат Мирзиёевнинг топшириғига биноан, бу борада фаолият юритиб келаётган врачлик-консультация комиссиялари (ВКК) тугатилади. Бундан мақсад — ушбу комиссиялар фаолияти билан боғлиқ коррупциявий ҳолатларни бартараф этиш.
Янги тизимда ногиронликни белгилаш оилавий шифокор тайёрлаган ҳужжатлар асосида амалга оширилади. Ушбу ҳужжатлар тегишли тиббий-ижтимоий экспертиза комиссиясига юборилади ва айнан шу орган якуний қарор қабул қилади.
Янги тартиб 2025 йил 1 июндан бошлаб Тошкент шаҳри ва Навоий вилоятида амалга киритилади. 1 сентябрга қадар ушбу тизим бутун мамлакат бўйлаб жорий этилиши режалаштирилган. Мутасадди идораларга мутахассисларни тайёрлаш ва ҳужжатлар айланмасини рақамлаштириш вазифаси юклатилган.
Энг асосий янгилик — жараён фуқаролар учун соддалаштирилади. Оилавий шифокор барча тиббий хулосаларни йиғади ва расмийлаштиради. Пациент ВККга бориши шарт эмас. МСЭ комиссияси ҳужжатларни текшириб, қарор қабул қилади.
Янги тизим фуқаролар ишончини оширишга хизмат қилиши ва коррупциянинг олдини олиши кутилмоқда. Буни амалга ошириш учун тегишли ҳуқуқий ҳужжатлар ва соғлиқни сақлаш ходимлари учун қўлланмалар тайёрланмоқда.
Маълумот учун, Ўзбекистонда 2023 йилдан электрон тиббий маълумотлар базаси жорий этилган бўлиб, у шифокорларга беморлар ҳақидаги маълумотларни реал вақтда алмашиш имконини бермоқда. Янги ногиронликни аниқлаш тизими айнан шу асосда ишлайди.