Ўзбекистон Қозоғистондан буғдой импортни 30% га оширди
0
"Қазақстан темір жолы" маълумотига кўра, 2024 йил сентябридан 2025 йил апрелигача Қозоғистон 7,6 миллион тонна янги ҳосил буғдойини экспорт қилган. Бу ўтган мавсумга нисбатан 58% кўпроқ бўлиб, мамлакат буғдойига бўлган талаб ошганини кўрсатади.
Қозоғистон буғдойининг асосий харидори — Ўзбекистон бўлиб, ушбу даврда 2,7 миллион тонна маҳсулот импорт қилган. Бу 2023–2024 йиллар мавсумига нисбатан 30% кўп. Ўзбекистон умумий экспорт ҳажмининг учдан бир қисмини ташкил этган.
Иккинчи ўринда Тожикистон — 1,1 миллион тонна (ўтган мавсумга нисбатан 1,5 баробар кўп). Учинчи ўринда эса Эрон — 889 минг тонна буғдой (16 баробар ўсиш).
Озарбайжонга экспорт 114 баробар ошиб, 569 минг тоннага етган. Афғонистон 270 минг тонна буғдой сотиб олган — бу ҳам 33% кўп. Қирғизистон эса 181 минг тонна импорт қилиб, ўтган йилга нисбатан икки баробар кўпроқ буғдой харид қилган.
2025 йил март ойида “Ўзбекистон темир йўллари” ва “Қазақстан темір жолы” компаниялари Қозоғистон буғдойини Афғонистонга транзит қилиш тарифини 40% га тушириш бўйича келишувга эришди. Чегирма Қорақалпоғистондаги Оазис — Сурхондарёдаги Галаба йўналишига тааллуқли.
2024 йилда Қозоғистон сўнгги 10 йил ичидаги энг катта буғдой ҳосилини йиғиб олди. Бу ички бозорни тўлиқ таъминлабгина қолмай, экспорт ҳажмини ҳам кескин оширишга имкон берди.