د افغانستان د پکتیا ولایت د ځاځي اریوب ولسوالۍ په ملي پارک کې د یو شخصي شرکت له خوا د سیلانیانو د اسانتیاوو لپاره د ۲۰۰ مېلیونه افغانیو په ارزښت پانګونه کېږي. په دې پانګونه به د سیلانیانو لپاره عصري هوټل، د برېښنا سیسټم، ګرځنده روغتون، د اووه کیلوميټره سړک اساسي جوړول او د ساتېری ځینې وسایل او امکانات برابر شي. د پکتیا ځاځي اریوب ولسوالۍ د سپينې شګې سیمه، چې د سپین غره په لمن کې پرته ده، شنه، سړه او ځنګلیزه سیمه ده، چې د افغانستان له بېلابېلو سیمو زرګونه سیلانیان ورځي. ځايي خلک او مسوولین تمه ښيي چې په دې ځای کې د اسانتیاوو په جوړېدو سره به د کورنیو او بهرنیو سیلانیانو ورتګ ډېر شي او یاد ملي پارک به په یوه ښه او دایمي عایداتي سرچینه بدل شي. په دې اړه نور حال د نجیب الله الوخېل په ويډيويي راپور کې وګورئ.
