Жиззахда палеолит ва неолит даври ёдгорликлари топилди
0
Тадқиқотлар 28 апрелдан 6 майгача Археология институтининг тош асри бўлими мутахассислари ва Маданий мерос агентлиги ходимлари томонидан олиб борилди. Галляарал туманидаги далалаб тадқиқотлари натижасида бир нечта муҳим объектлар аниқланди.
Угат қишлоғининг ғарбий қисмида палеолит даврига оид жойлашув топилди. Дастлабки таҳлилларга кўра, бу ерда минг йиллар аввал одамлар доимий ёки мавсумий яшаган бўлиши мумкин.
Коропчи қишлоғининг шимолий четларида неолит даврига оид икки археологик объект топилди. Улар қадимги жамоаларнинг деҳқончилик ва чорвачиликка ўтиш жараёни ҳақида маълумот беради.
Ёнбоштут қишлоғининг шимолида жойлашган "Бешбулак" номли яна бир неолит ёдгорлиги аниқланди. Бу ерда қадимги жамоаларнинг ижтимоий ва маданий ҳаётига оид излар қайд этилган.
Тадқиқотчилар ушбу топилмалар Ўзбекистон ҳудудидаги илк жамоаларнинг ҳаёти ва жамият тузилиши ҳақидаги тасаввурларни кенгайтиришга ёрдам беради, деб ҳисоблашмоқда.