Анчелотти Бразилия терма жамоасининг янги бош мураббийи – Бразилия яна тахтга қайтадими?

Жаҳон футболида катта шов-шув кўтарилди. Италиялик машҳур мутахассис, ҳозирда Мадриднинг “Реал” клубини бошқараётган Карло Анчелотти, Бразилия миллий жамоасининг янги бош мураббийи этиб расман тайинланди. Бу ҳақда Бразилия футбол конфедерацияси расмий эълон қилди.

Футбол конфедерацияси президенти Эдналдо Родригес бу тарихий воқеани катта ҳаяжон ва ифтихор билан шундай изоҳлади:

– «Карло Анчелоттининг Бразилия терма жамоаси бошқарувига келишини оддий бир тактик ёки стратегик қадам сифатида қабул қилмаслик керак. Бу – бутун футбол оламига йўлланган улкан бир баёнотдир. Бизнинг мақсадимиз аниқ – яна бир бор футбол тахтининг энг юқори чўққисига чиқиш! Анчелотти тарихдаги энг кучли ва тажрибали мутахассислардан бири бўлиб, у дунёдаги энг машҳур клубларда ўзининг юқори даражали маҳоратларини кўрсата олган. Энди биз биргаликда Бразилия футбол тарихига янги, шонли ва унутилмас саҳифалар ёзамиз», – деди Родригес.

Маълумки, Анчелотти бу мавсум охирида “Реал Мадрид” жамоасидан кетади. Унинг клуб билан шартномаси якунланганидан сўнг, Анчелотти «пентакампеонлар» сафида расман ўз вазифасини бошлайди.

Яқинда ўтказиладиган 2026 йилги Жаҳон чемпионати саралаш босқичидаги баҳслар Анчелотти учун дастлабки жиддий синов бўлади. У бошчилигидаги Бразилия терма жамоаси 6 июнь куни Эквадорга, 11 июнь куни эса Парагвайга қарши майдонга тушади.

Карло Анчелоттининг тайинланиши дунёдаги барча футбол мухлислари ва экспертлари томонидан қизғин кутиб олинди. Мутахассисларнинг таъкидлашича, италиялик мураббий тажрибаси ва ўзгача ўйин услуби билан Бразилия миллий термасига янги руҳ, янги ғоялар олиб кириши кутилмоқда.

Анчелотти – «Милан», «Ювентус», «Челси», «Бавария», ПСЖ каби гранд жамоаларда фаолият олиб борган. Шунингдек, у икки марта Чемпионлар лигаси кубогини қўлга киритган энг кучли мураббийлардан бири ҳисобланади. Ҳозирда у Мадриднинг “Реал” клубида муваффақиятли фаолият олиб бормоқда ва бу мавсумдан кейин клуб билан хайрлашиши аниқ бўлди.

Бразилия футболи узоқ вақтдан буён халқаро ареналарда юқори натижага эриша олмаётган эди. Анчелоттининг жамоага келиши бу вазиятни ўзгартиришга қодир бўлиши кутилмоқда. Футбол оламининг кўзлари энди Карло Анчелотти ва унинг янги шогирдлари қандай натижаларга эришишига қаратилади.

Zamin.uz таҳририяти Карло Анчелоттига янги вазифасида улкан муваффақиятлар тилаб қолади. Бразилия футболи яна бир бор чўққига кўтарилиши учун бу тарихий тайинлов муҳим омил бўлишига ишонамиз!