«Звезды из Завтра» программасының финалистлары Татарстанның төп сәхнәсендә чыгыш ясаячак
16 майда Салих Сәйдәшев исемендәге Дәүләт зур концертлар залында яшь музыкантларга ярдәм итү буенча «Звезды из Завтра» республика иҗади программасының юбилей сезонының йомгаклау концерты була. Бу хакта «Татар-информ»га La Primavera оркестры матбугат хезмәтендә сөйләделәр.
Татарстанның төп концерт сәхнәсенә гадәти музыка мәктәпләреннән 210 укучы чыгачак. Алар барысы да тыңлаулар узды һәм La Primavera программасының һәм оркестрының сәнгать җитәкчесе Рөстәм Абязовтан катнашырга чакыру алды.
«Тыңлауларны мин һәрвакыт шәхсән уздырам. Аннары балалар Казанда һәм республиканың тагын биш шәһәрендә узган гала-концертларда катнашты. Иң яхшыларның иң яхшыларын без программа финалына чакырдык», - дип сөйләде Абязов.
Ул программада катнашучыларның елдан-ел арта баруын билгеләп үтте.
«Звезды из Завтра» гала-концертында катнашырга дәгъва кылу өчен балаларга да, педагогларга да күп эшләргә кирәк. Һәм бу эшнең нәтиҗәсе инде сизелә», - диде Абязов.
Программада катнашу бушлай, быел анда 1535 бала катнашты. Концертлар өчен махсус оркестровкалар булдырылды, алар соңыннан музыка мәктәпләре һәм яшь музыкантлар карамагында кала.
Программаның барлык концертлары оркестр ресурсларында һәм «Прокультура.рф» сайтында онлайн трансляцияләнә.