Honda компаниясининг даромади кескин тушмоқда: сабаб Трампнинг иқтисодий сиёсатими?

Япониянинг йирик автомобил ишлаб чиқарувчиларидан бири бўлган Honda Motor компанияси АҚШ президенти Доналд Трампнинг иқтисодий сиёсати билан боғлиқ ноаниқликлар сабабли ўзининг жорий молиявий йилида фойдаси 59 фоизга тушишини башорат қилмоқда. Бу ҳақда Reuters ахборот агентлиги хабар бермоқда.

Маълум қилинишича, Honda компанияси 2026 йилнинг мартида якунига етадиган молиявий йилда тахминан 500 миллиард иена (3,38 миллиард доллар атрофида) фойда кўради. Бу кўрсаткич ўтган молиявий йилда эришилган 1,21 триллион иенага нисбатан сезиларли даражада пастдир.

Компания бу ҳолатни АҚШ томонидан жорий қилинган тарифлар ва янги иқтисодий қоидалар туфайли юзага келган ноаниқ вазият билан боғламоқда. Хусусан, Honda раҳбарияти бу шароитда Канадада электромобилларни ишлаб чиқариш ва етказиб бериш бўйича тармоқни қуришга доир режаларни кечиктиришга қарор қилди. Янги электрли транспорт воситалари ишлаб чиқариш дастури, тахминларга кўра, тахминан икки йилга тўхтатилади.

Honda компанияси расмийлари фикрича, бу қарор кутилмаган иқтисодий хатарларни камайтириш ва глобал бозордаги мавқени сақлаб қолиш мақсадида қабул қилинмоқда. Шунингдек, компания бу босқичда мавжуд ишлаб чиқариш тармоқларини модернизация қилиш ва глобал талабга мослаштиришга эътибор қаратишини маълум қилди.

Экспертлар таъкидлашича, Honda Motor компаниясининг фойдасидаги кескин пасайиш нафақат компаниянинг ўзи, балки бутун автомобиль бозорига ҳам таъсир қилиши мумкин. Айниқса, электр автомобиллар ишлаб чиқариш соҳасидаги рақобат авж олаётган бир пайтда бу каби қарорлар келажакдаги бозор тақсимотига таъсир ўтказади.

Шу билан бирга, бошқа йирик автомобил ишлаб чиқарувчилари ҳам АҚШнинг иқтисодий сиёсати билан боғлиқ ноаниқликларга қарши ўз режаларини қайта кўриб чиқмоқда. Бу, ўз навбатида, жаҳон автомобиль саноатида янги мувозанатнинг шаклланишига олиб келиши мумкин.