«Հայփոստի» շենքն ու հարակից շինությունները կքանդվեն․ նախագիծն ավագանու նիստի օրակարգում է. Factor

Կենտրոն վարչական շրջանի Սարյան փողոցում գործող «Հայփոստի» շենքն ու հարակից 13 հազար 200 քառ/մետր մակերեսով տարածքի բոլոր շինությունները կքանդվեն։ «Համաշխարհային առևտրի կենտրոն Երևան» ՓԲԸ-ն նախագիծը ներկայացրել է Երևանի ավագանու համաձայնեցմանը։ Որոշման նախագիծն ընդգրկված է ավագանու մայիսի 20-ի հերթական նիստում՝ չզեկուցվող ընթացակարգով։ Այս մասին հայտնում է Factor.am-ը:

«Կենտրոն վարչական շրջանի Սարյան փողոց հ. 22 շենք, 2 շինություն և Սարյան փողոց հ. 22 հասցեներում գոյություն ունեցող շինությունների քանդման նախատեսվող գործունեության վերաբերյալ ս.թ. ապրիլի 16-ին ժամը 11:00-ին Երևան քաղաքի Կենտրոն վարչական շրջանի ղեկավարի նստավայրում օրենքով սահմանված կարգով տեղի է ունեցել առաջին հանրային լսումը: Համայնքի կողմից ապահովել է համայնքի ներկայացուցչի մասնակցությունը: Շահագրգիռ հանրության կողմից գրավոր կամ էլեկտրոնային եղանակով առաջարկություններ, դիտողություններ և կարծիքներ չեն ներկայացվել»,- ասված է նախագծում։

Նշենք, որ «Հայփոստի» շենքի տեղում Համաշխարհային առևտրի կենտրոն է կառուցվելու՝ չորս աստղանի հյուրանոց, կոնֆերանս դահլիճներ, համերգասրահ, ցուցասրահներ, գործարար կենտրոն և այլն։ Համաշխարհային առևտրի կենտրոնի կառուցապատողը «Ռենշին» ընկերությունն է, հայտարարվում է 210 մլն դոլարի ներդրման մասին։

The post «Հայփոստի» շենքն ու հարակից շինությունները կքանդվեն․ նախագիծն ավագանու նիստի օրակարգում է. Factor first appeared on MediaLab Newsroom-Laboratory.