Рөстәм Миңнеханов Казан Кремлендә Гурбангулы Бердымөхәммәдов белән очрашты
Татарстан Рәисе Рөстәм Миңнеханов һәм төркмән халкының милли лидеры, Төрекмәнстан Халк Мәсләхәте рәисе Гурбангулы Бердымөхәммәдов Казан Кремлендә очрашу уздырдылар. Бу хакта ТР Рәисе матбугат хезмәте җитәкчесе Лилия Галимова Телеграм-каналында хәбәр итте.
Очрашу Бердымөхәммәдовның Россия Президенты Владимир Путин белән телефоннан сөйләшүеннән соң булды.
Татарстан Рәисе Телеграм-каналында Татарстан Дәүләт Киңәшчесе Минтимер Шәймиев һәм Гурбангулы Бердымөхәммәдов белән төшкән фотография куйды, төрекмән халкының милли лидеры – Казанда кадерле һәм көтелгән кунак икәнлеген, Татарстан белән Төрекмәнстанның партнерлар гына түгел, беренче чиратта дуслар да булуын искәртте.
«Безгә Төрекмәнстан Халк Мәсләхәтенең хөрмәтле рәисе Корбангулы Бердымөхәммәдов кушылды. Хезмәттәшлегебезгә игътибарлы булуыгыз өчен рәхмәт белдерәм. Төрекмәнстан безнең өчен партнер гына түгел, кадерле дус та!» – дип билгеләп үтте Рөстәм Миңнеханов.
Владимир Путин һәм Гурбангулы Бердымөхәммәдов әңгәмәсе барышында бер-берсен Бөек Ватан сугышында Җиңүнең 80 еллыгы белән котладылар һәм киләчәктә Россия белән Төрекмәнстан арасында стратегик партнерлыкны ныгыту перспективалары турында фикер алыштылар.
Элегрәк «Татар-информ» Гурбангулы Бердымөхәммәдов Казанга «Россия – Ислам дөньясы: KazanForum» халыкара икътисади форумында катнашу өчен килгән дип хәбәр иткән иде. Ул ислам илләренә Ефәк юлның заманча аналогы булган энергетика, транспорт һәм технологик пояс булдырырга тәкъдим итте. Аның фикеренчә, мондый система Евразия өчен стратегик күпер булачак һәм төбәкнең икътисади үсешен көчәйтергә мөмкин.
Видео: Лилия Галимованың Телеграм-каналыннан