Байкал аръягы мөселманнары яңгыр сорап дога кылачак
Байкал аръягы краенда 500 мең гектардан артык мәйданда 40 урман янгыны таралган. Бурятиядә 22 актив янгын күзәтелә. Җомга көнне бөтен Байкал аръягы мөселманнары яңгыр сорап дога кылачак. Бу хакта Россия мөселманнары Диния нәзарәте матбугат хезмәте хәбәр итә.
«Җомга көнне, 16 майда, Чита Җәмигъ мәчетендә һәм шулай ук Байкал аръягы краеның барлык мәчетләрендә мөселманнарның Диния нәзарәте инициативасы белән яңгыр сорап дога кылыначак. Шулай ук җомга намазыннан соң да яңгыр турында дога укыла», – дип мөрәҗәгать итте төбәкнең имам-мөхтәсибе Алмаз Сәлахов.