ზელენსკი პარტნიორებს ომის დასასრულებლად რუსეთის იძულებაზე ელაპარაკება
20 მაისს უკრაინის პრეზიდენტი ვოლოდიმირ ზელენსკი იტალიის პრემიერ-მინისტრ ჯორჯია მელონისა და ფინეთის პრეზიდენტ ალექსანდერ სტუბს ესაუბრა.
ჯორჯია მელონისთან საუბრის შესახებ ზელენსკი X-ზე წერს, რომ „სიცოცხლეების გადასარჩენად საჭიროა ცეცხლის შეწყვეტა. საჭიროა პატიოსანი დიპლომატია. უკრაინა მზად არის ამისთვის და არსებითია იმის უზრუნველყოფა, რომ რუსეთი იყოს მზად ომის მართლა დასასრულებლად“.
ისევე როგორც მელონისთან, ფინეთის პრეზიდენტ ალექსანდერ სტუბთანაც მსჯელობის თემა იყო 19 მაისის სატელეფონო საუბარი აშშ-ის პრეზიდენტ დონალდ ტრამპთან.
"ცხადია, რომ რუსეთი ცდილობს დროის მოგებას ომისა და ოკუპაციის გასაგრძელებლად. ვმუშაობთ პარტნიორებთან იმის უზრუნველსაყოფად, რომ რუსებმა ზეწოლის შედეგად შეცვალონ ქცევა. სანქციები მნიშვნელოვანია და მადლიერი ვარ ყველასი, ვინც მათ უფრო ამწვავებს ამ ომზე პასუხისმგებლების მიმართ".
უკრაინის პრეზიდენტს ეჭვი არ ეპარება, რომ "ომი უნდა დასრულდეს მოლაპარაკებების მაგიდასთან. წინადადებები უნდა იყოს მკაფიო და რეალისტური. უკრაინა მზად არის ნებისმიერი ფორმატის მოლაპარაკებებისთვის, რომლებიც შედეგებს მოიტანს". ამასთან, ზელენსკი თვლის, რომ "თუკი რუსეთი განაგრძობს არარეალური პირობების შემოთავაზებას და პროგრესისთვის ძირის გამოთხრას, ამას მძიმე შედეგები უნდა მოჰყვეს".
ვოლოდიმირ ზელენსკი კიევში მასპინძლობს ნორვეგიის პრინც ჰოკონს. განხილვის მთავარი თემა უკრაინის ენერგომედეგობის ხელშეწყობაა. ნორვეგიამ უკრაინას 450 მლნ დოლარის დახმარება გაუწია ენერგოუსაფრთხოების კუთხით.
19 მაისს შედგა აშშ-ისა და რუსეთის ფედერაციის პრეზიდენტების სატელეფონო საუბარი უკრაინაში ომის დასრულების საკითხზე. ხანგრძლივი საუბრის შემდეგ ჯერ ვლადიმირ პუტინმა განაცხადა, რომ რუსეთი "მზად არის, იმუშაოს უკრაინასთან მემორანდუმზე შესაძლო მომავალი სამშვიდობო შეთანხმების თაობაზე, რიგი პოზიციების განსაზღვრით - ისეთებისა, როგორებიცაა, მაგალითად, მოგვარების პრინციპები, სამშვიდობო შეთანხმების შესაძლო დადების ვადები და ა.შ., შესაბამისი შეთანხმებების მიღწევის შემთხვევაში, ცეცხლის შესაძლო შეწყვეტის ჩათვლით“. დონალდ ტრამპმა კი დაწერა, რომ "რუსეთი და უკრაინა დაუყოვნებლივ დაიწყებენ მოლაპარაკებებს ცეცხლის შეწყვეტის და რაც უფრო მნიშვნელოვანია - ომის დასრულების მისაღწევად".