Ўзбекистонда авто ва мото туризм ривожлантирилади
0
Стратегияда авто ва мото туризмни ривожлантириш алоҳида йўналиш сифатида кўриб чиқилмоқда. Бу йўналиш кўплаб давлатларда катта иқтисодий самара берган ва миллиардлаб доллар даромад келтирмоқда.
Дастлабки концепцияга кўра, Ўзбекистонда табиий ва тоғли ҳудудларда авто ва мото саёҳатчилар учун махсус кемпинглар ва туристик базалар барпо этилади. Бу объектлар ҳар бир минтақа ландшафти ва иқлимига мос ҳолда ишлаб чиқилади.
Автотуризмни оммавий қилиш мақсадида маҳаллий автофургон ва прицеплар ишлаб чиқариш ташкил этилиши режалаштирилмоқда. Бу жараёнга маҳаллий корхоналар билан бирга хорижий инвестор ва ишлаб чиқарувчилар жалб этилади. Натижада янги иш ўринлари яратилади ва тегишли тармоқлар ривожланади.
Шунингдек, мамлакат йўлларида кичик ҳажмли «ақлли» автозаправка станцияларини ўрнатиш кўзда тутилган. Уларнинг афзаллиги шундаки, улар катта ёқилғи омборларини талаб қилмайди ва олис ҳудудларда автосаёҳатчиларга хизмат кўрсата олади. Бу маҳаллий кичик бизнес учун янги имкониятлар яратиб, автотуризм инфратузилмасини кенгайтиради.
Мутаҳассислар АҚШ, Германия ва Франция тажрибасини мисол қилиб келтириб, бу модельнинг самарали эканини таъкидлашмоқда. Уларда авто ва мото туризм ички саёҳатнинг асосий қўзғатувчисига айланган ва миллиардлаб даромад келтиради.
Ўзбекистон ҳам ноёб табиий ва тарихий-маданий йўналишларга эга экан, шу имкониятдан самарали фойдаланиши мумкин. Янги стратегия туристик соҳанинг ривожинигина эмас, балки эркин ва мустақил саёҳат қилиш имкониятини ҳам кўзда тутади. Турист ўз транспортида юрган ҳолда мамлакатни ўзи ўрганади, янги маршрутларни кашф этади ва янги хизматларга талаб яратади.