Анчелоттининг эҳтиросли видолашуви: “Реал – бу менинг юрагимдаги клуб”

Карло Анчелотти "Реал Мадрид" клуби билан яна бир тарихий даврни якунлаш арафасида турибди. Итальян мутахассиси ўзининг кетиши олдидан ўта самимий ва чуқур маъноли сўзлар билан мухлисларига, футболчиларга ва клуб раҳбариятига миннатдорчилик изҳор қилди.

Анчелотти матбуот анжуманида шундай деди:
“Мен бу ердан хафа бўлиб кетмаяпман, аксинча – бахт ва ифтихор билан кетяпман. “Реал”да ўтказган ҳар бир дақиқам мен учун катта неъмат бўлди. Президент Флорентино Перес билан муносабатларимиз доимо самимий ва англашувчан руҳда бўлди. У менга бошидан охиригача ишонди ва қўллаб-қувватлади.”

Тажрибали мураббийнинг фикрича, жамоа таркибидаги янгиланишлар табиий жараён. “Ҳа, Лука Модрич кетмоқда. Бу бир даврнинг ниҳояси – “олтин” авлоднинг расман якунланиши. Албатта, Дани Карвахаль ҳали сафда, аммо у ҳам жароҳати туфайли доимий ўйин амалиётига эга эмас. Биз аввал Каземиро, Роналду, кейинчалик Бензема билан ҳам хайрлашганмиз. Футбол шундай – ҳар давр ўз ўрнини бошқасига бўшатади.”

Анчелотти алоҳида таъкидладики, “Реал” ҳар қандай вазиятда ҳам дунё футболида етакчи клуб бўлиб қолади. “Бу клуб ҳамиша энг яхши бўлган. Бугун ҳам, эртага ҳам, кейин ҳам шундай бўлади.”

“Энг эсда қоларли ўйин? Жавоб бериш қийин. “ПСЖ”, “Челси” ва “Манчестер Сити”га қарши ўйинлардаги камбэклар – бундай “ремонтада”лар унутилмайди. Бу ўйинларда биз “Бернабеу”даги сеҳрни қайта ҳис қилганмиз”, – дейди Анчелотти.

У шунингдек, ўз ўрнини эгаллайди деб тахмин қилинаётган Хаби Алонсо ҳақида ҳам фикр билдирди:
“Уда бутун зарур сифатлар бор. Мен унга фақат омад ва тинчлик тилайман. Унинг қўли остидаги “Реал” ҳам ўз тарихини ёзишига ишонаман.”

Анчелотти, сўнгги гап сифатида, "Реал" билан муносабатларини сўз билан ифодалаш мушкуллигини, аммо бу муносабат “абадий асал ойи”дек кечаётганини айтиб ўтди:
“Бу клуб менинг ҳаётимда ўчмас из қолдирди. “Реал” – бу менинг юрагимдаги клуб.”