Алматы маңындағы оқушының өлімі: ІІМ өкілі мән-жайды айтты
Ішкі істер министрінің орынбасары Санжар Әділов Алматы облысында болған қайғылы оқиғаға қатысты пікір білдірді. Оқушы түлектер кешінде шампурдан алған жарақаттан қаза тапқан еді, - деп хабарлайды Tengrinews.kz тілшісі.
Әділовтің Мәжіліс кулуарында айтуы бойынша, кәмелетке толмаған күдікті екі айға қамауға алынған.
"Қасақана адам өлтіру дерегі бойынша қылмыстық іс қозғалды. Тергеу тобы жұмыс істеп жатыр. Қазір белсенді тергеу әрекеттері жүргізіліп жатыр. Мектеп директоры қызметінен босатылды, оқу ісі жөніндегі меңгеруші мен екі сынып жетекшісіне қатаң тәртіптік жаза қолданылды", – деді спикер.
Журналистер күдіктінің не себепті мұндай әрекетке барғанын сұрады.
"Барлық мән-жай соталды тергеу барысында анықталады. Қазір тергеу енді ғана басталды", – деп жауап берді Әділов.
Алматы облысындағы жантүршігерлік оқиға
Соңғы қоңырау рәсімінен кейін Қырғауылды ауылындағы мектеп түлектері мерекені атап өту үшін Долан ауылынан жеке үй жалдаған. Мектеп әкімшілігінің айтуынша, кешке екі бітіруші сыныптың оқушылары жиналған.
Трагедия кеш басталғаннан кейін бірнеше сағат өткен соң болған. Марқұм Әлибидің туыстарының айтуынша, кеш соңына қарай балалардың бірі қолына кәуәп пісіретін шампурды алып, басқаларды қорқыта бастаған. Әліби оны сабырға шақырмақ болғанда, жүрек тұсына соққы жасаған. Ол бір ауыз сөз айтуға да үлгермей, оқиға орнында жан тапсырған.
Мектеп директорының айтуынша, мектеп әкімшілігі түлектер кешінен бейхабар болған. Соңғы қоңырау қарсаңында ата-аналардан балалардың мектептен тыс жерде ешқандай шараға қатыспайтыны туралы қолхат алынған.
Күдіктінің ата-анасы – баланы тәрбиелеу міндеттерін дұрыс орындамағаны үшін әкімшілік жауапкершілікке тартылды.
Сілтемесіз жаңалық оқисыз ба? Онда Telegram желісінде парақшамызға тіркеліңіз!