“Челси” Санчони тўлиқ сотиб олишга тайёр, лекин келишув хавф остида

Европа Чемпионлар лигасига йўл олган Лондоннинг “Челси” клуби келаси мавсум учун таркибни кучайтиришга киришди. “Аристократлар”нинг навбатдаги асосий трансфер нишони — “Манчестер Юнайтед”га тегишли бўлган, аммо сўнгги мавсумда ижара асосида ўйнаган Жейдон Санчо.

Маълум бўлишича, “Челси” клуби 25 ёшли англиялик ярим ҳимоячини тўлиқ сотиб олиш ниятида. Ҳозирда клуб раҳбарияти футболчи билан шахсий шартнома шартлари юзасидан музокара олиб бормоқда.

Маош масаласи — асосий тўсиқ

Машҳур трансфер инсайдери Фабрицио Романо хабар беришича, музокаралар жараёнида асосий муаммо — маош масаласидаги келишмовчилик бўлмоқда. “Челси” таклиф қилаётган хизмат ҳақи Санчонинг талабларига мос келмаяпти. Агар яқин кунларда томонлар ўзаро келишувга эриша олмаса, футболчи қайтиб “Манчестер Юнайтед” сафини тўлдириши мумкин.

Санчо — порлоқ старт, қарама-қарши йўналиш

Жейдон Санчо футболдаги илк қадамларини “Манчестер Сити” академиясида ташлаган. Кейинчалик у Германиянинг “Боруссия Дортмунд” клубида катта саҳнага чиқди ва Европанинг энг иқтидорли футболчиларидан бири сифатида танилди.

2021 йили “Манчестер Юнайтед” уни 85 миллион еврога харид қилди. Аммо катта умидлар билан олиб келинган Санчо “Олд Траффорд”да ўзини тўлиқ намоён эта олмади. Унинг ўйин сифати пасайиб кетди, клуб мураббийлар штаби билан келишмовчиликлар келиб чиқди ва натижада охирги икки мавсумни бошқа жамоаларда ижарада ўтказди.

Жейдон Санчо учун “Челси”га тўлиқ ўтиш — фаолиятини қайта тиклаш ва янги саҳифа очиш имкони бўлиши мумкин. Бироқ бунинг учун футболчи ва клуб ўзаро шартларда мувозанат топиши лозим. Агар келишув амалга ошмаса, юлдуз футболчи яна бир бор “Юнайтед”даги мураккаб муҳитга қайтишига тўғри келади. Ҳозирча барча кўзлар Лондон ва Манчестер ўртасидаги музокараларга қаратилган.