“Арсенал”да катта тозалаш: жамоа 20 футболчи билан хайрлашди!

Англия Премьер-лигасида кетма-кет иккинчи мавсумда ҳам чемпионлик унвонига эга чиқолмаган "Арсенал" таркибини жиддий равишда янгилашга қарор қилди. Лондонликлар асосий таркибдан тортиб, ёшлар ва аёллар жамоаларидан ҳам бир қатор футболчилар билан хайрлашганини расман маълум қилди.

Клуб раҳбарияти ва бош мураббий Микель Артета янги мавсумга тайёргарлик доирасида асосий таркибнинг 4 нафар машҳур футболчиси билан шартномани янгиламасликка қарор қилди. "Канонирлар" ҳимоя чизиғи футболчиси Киран Тирни, ярим ҳимоячи Жоржиньо, бразилиялик дарвозабон Нето ҳамда ҳужумкор ўйинчи Раҳим Стерлинг билан хайрлашишди.

Қайд этиш жоизки, мавсум бошида “Борнмут”дан ижара асосида келган Нето ва “Челси”дан жалб қилинган Стерлингнинг ўйини клуб раҳбарияти ва мураббий Микель Артетанинг умидларини оқламади. Натижада улар ўзларининг асосий клубларига қайтарилди.

Шунингдек, асосий таркибдаги муҳим ўйинчилардан бири – Гана терма жамоаси вакили Томас Партининг келажаги ҳалигача ноаниқлигича қолмоқда. Тажрибали ярим ҳимоячининг шартномаси яқин кунларда якунига етади ва унинг агенти ҳозирда клуб билан янги шартнома бўйича музокаралар олиб бормоқда. Партининг жамоада қолиши ёки кетиши ҳали охирги ҳал қилинмаган масалалардан бири бўлиб турибди.

Бу футболчилардан ташқари, ёшлар ва қизлар жамоасидан ҳам бир нечта футболчилар билан хайрлашилди. Умумий ҳисобда "Арсенал" 20 нафар ўйинчи билан йўлларини ажратгани кўпчиликни ҳайратда қолдирди.

Маълумотларга кўра, клуб бундай кенг кўламли ўзгаришлар орқали келаси мавсумда нафақат чемпионлик учун жиддий рақобатчига айланишни, балки янги иқтидорли футболчиларни таркибга жалб қилиб, узоқ муддатли ривожланиш режасини амалга оширишни мақсад қилган.

Микель Артета эса янги мавсум олдидан катта трансферлар қилишни режалаштираётганини айтиб ўтди. "Биз ҳар жиҳатдан кучли ва чемпионликка лойиқ жамоа тузамиз", деди испаниялик мутахассис.

Эслатиб ўтамиз, "Арсенал" сўнгги икки мавсум давомида Англия Премьер-лигасида чемпионлик пойгасида етакчи бўлишига қарамай, мавсумнинг сўнгги босқичларида қимматли очколарни йўқотиб, совринни "Манчестер Сити"га бой берган эди.

Энди янги таркиб ва янги стратегия билан "Арсенал" ўз мухлисларига узоқ кутилган чемпионлик совғасини тақдим эта оладими, буни фақат келаси мавсум кўрсатади. Бугунги ўзгаришлар эса жамоада катта ислоҳотлар бошланганидан дарак бермоқда.