Նիկոլ Փաշինյանն իր վարքով թուլացնում է և՛ Եկեղեցին, և՛ պետությունը, նման վարքն անթույլատրելի է. Հրաչյա Արզումանյան

«Մեդիալաբի» հարցերին պատասխանում է քաղաքական գիտությունների դոկտոր, ազգային անվտանգության հարցերի փորձագետ Հրաչյա Արզումանյանը 

– «Ինձ համար իհարկե անընդունելի է, երբ Եկեղեցին քաղաքականացվում է, բայց այսօր դա է վիճակը, պետությունն ու Եկեղեցին պետք է միասին աշխատեն: Ուրիշ գործոններ, որ կարող են օգնել Հայաստանին, Հայաստանի իշխանություններին, ես ուղղակի չեմ տեսնում»,- մեր հարցազրույցներից մեկի ժամանակ նման միտք ասացիք, պարո՛ն Արզումանյան: Վերջին օրերին Նիկոլ Փաշինյանն անընդհատ գրառումներ է անում Ամենայն Հայոց Կաթողիկոսի, տարբեր հոգևորականների վերաբերյալ: Կատարվողն ինչպե՞ս եք գնահատում:

Պանդորայի արկղը բացվել է Արցախում. Ուկրաինայում այսօր կատարվողը նույն քաղաքականությունն է, ինչ արվեց Արցախում. Հրաչյա Արզումանյան 

– Կատարվողը, ցավոք սրտի, բավականին տրամաբանական է: Այն, ինչ մենք այսօր տեսնում ենք, որևէ կապ չունի ո՛չ պետական, ո՛չ ազգային շահի հետ: Տեսանելի է երկու շերտանոց գործընթաց. Նիկոլ Փաշինյանի քայլերը զուտ իշխանությունը պահպանելու տրամաբանության մեջ են տեղավորվում: Իշխանությունը պահելու համար Նիկոլ Փաշինյանը փորձում է ապամոնտաժել ու հարվածներ է հասցնում Եկեղեցուն: 

Սերժ Սարգսյանի Սահմանադրության տրամաբանությունը ավտորիտար է, ու բոլոր ավտորիտար առաջնորդները փորձում են իրենց ձեռքում կենտրոնացնել ողջ իշխանությունը, դրա համար էլ Նիկոլ Փաշինյանը մտնում է պատերազմի մեջ Հայ Առաքելական եկեղեցու հետ այդ հարցը լուծելու համար, նա ուզում է լինել միակը, որը Հայաստանում որոշումներ է կայացնում: 

Երկրորդ շերտն ավելի շատ կախված է արտաքին ուժային կենտրոնների ռազմավարությունից ու քաղաքականությունից, որոնք նպատակ ունեն ապամոնտաժել հայկական պետությունը ու Նիկոլ Փաշինյանի միջոցով հարվածներ են հասցնում հայ ազգի ինքնությանը: 

Այս ամենը տեղի է ունենում հոգեբանական ու տեղեկատվական պատերազմի մեթոդներով ու տրամաբանությամբ: Հայ Առաքելական Եկեղեցու դեմ այս հարվածները ևս մտնում են այդ տրամաբանության մեջ, Նիկոլ Փաշինյանը կիրառում է տեղեկատվական ու հոգեբանական պատերազմի այդ դասական մեթոդները: 

Հիմա այդ ամենը Փաշինյանն անում է, որ իշխանությունը պահի՞, թե՞ այստեղ աշխատում են նաև ուժային կենտրոնները՝ Ռուսաստան, Թուրքիա և ուրիշներ, ինձ համար էական չէ, որովհետև հետևանքները ցանկացած դեպքում էլ նույնն են՝ հարվածներ հայ ազգի ինքնությանը, պետությանը, որն իրականացնում է ՀՀ վարչապետը: Նիկոլ Փաշինյանն իր վարքով թուլացնում է և՛ Եկեղեցին, և՛ պետությունը: Նման վարքն անթույլատրելի է, ու ես վստահ եմ, որ Հայ Առաքելական Եկեղեցին կհաղթահարի այս ամենը:

– Ինչպե՞ս եք գնահատում Եկեղեցու արձագանքն այս ամենին:

– Մենք գտնվում ենք մի վիճակում, որում բոլոր կողմերը պարտվում են, մի ռազմավարություն է իրականացվում Նիկոլ Փաշինյանի ձեռքերով կամ կողմից, որում բոլոր կողմերը պարտվում են, հաղթում է թշնամին՝ այն ուժային կենտրոնները, որ ուզում են Հայաստանը ոչնչացնել: Հետևաբար չեմ ուզում որևէ վերլուծություն անել, կարևոր է հասկանալ, որ այստեղ բոլորը կորցնում են, Նիկոլ Փաշինյանը՝ ևս:

– Պարո՛ն Արզումանյան, իսկ Եկեղեցին այս պարագայում ի՞նչ պետք է անի:

– Եկեղեցին արդեն արել է՝ տարածելով հայտարարությունը, որը միանգամայն նորմալ էր ու տրամաբանական: Բայց Նիկոլ Փաշինյանը վաղուց դուրս է Սահմանադրությունից ու հարվածում է պետությանը, մենք՝ որպես հասարակություն, չպետք է ընդունենք այս վարքը, պետք է ազդել նրա վրա: 

Կոչ ենք ուղղում իրավասու պետական մարմիններին՝ կասեցնել վարչապետի անօրինական քաղաքականությունը. Մայր Աթոռ

Ես նաև հասկանում եմ, որ Նիկոլ Փաշինյանը հանուն պետության շահերի չի գնա երկխոսության Եկեղեցու հետ, բայց գոնե պետք ազդել, որ դադարեցնի այս արշավը: Եթե Նիկոլ Փաշինյանը այսպես շարունակի, մենք կարող ենք ունենալ անկանխատեսելի հետևանքներ, ինչն անընդունելի է ինձ համար, ես կրկնում եմ, որ այս ամենի մեջ բոլորն են պարտվում, հաղթում է մեր թշնամին:

Քրիստինե Աղաբեկյան

MediaLab.am

The post Նիկոլ Փաշինյանն իր վարքով թուլացնում է և՛ Եկեղեցին, և՛ պետությունը, նման վարքն անթույլատրելի է. Հրաչյա Արզումանյան first appeared on MediaLab Newsroom-Laboratory.