Россия көне уңаеннан 11 июньдә эш көне бер сәгатькә кыскарак булачак
Чәршәмбе, 11 июньдә, эш көне бер сәгатькә кыскарак булачак, чөнки ул бәйрәм алды көне санала. РФ Президенты каршындагы Россия халык хуҗалыгы һәм дәүләт хезмәте академиясе эксперты Татьяна Подольская шулай дип белдерде. Бу хакта РИА Новости агентлыгы хәбәр итә.
Аның әйтүенчә, мондый карар 12 июньдә билгеләп үтелә торган Россия көнен бәйрәм итүгә бәйле.
Әлеге бәйрәм 1992 елның 11 июнендә РФ Югары Советының «12 июньдә бәйрәм көне турында»гы карары белән гамәлгә куелган. 1994 елда ул дәүләт статусын һәм «Дәүләт суверенитеты турында Декларация кабул итү көне» атамасын ала, ә 2002 елдан рәсми рәвештә Россия көне дип атала – бу атама РФ Хезмәт Кодексында беркетелгән. Россия Президенты 1998 елда гражданнарга мөрәҗәгатендә бәйрәмнең исемен үзгәртү тәкъдиме белән чыккан иде.