Олег Коробченко җиңел сәнәгать хезмәткәрләрен һөнәри бәйрәмнәре белән тәбрик итте

Татарстан Премьер-министры урынбасары - сәнәгать һәм сәүдә министры Олег Коробченко текстиль һәм җиңел сәнәгать хезмәткәрләрен һәм ветераннарын һөнәри бәйрәмнәре белән котлады. Ул тармак белгечләренә республика үсешенә керткән өлешләре өчен рәхмәт белдерде һәм бу өлкәнең сизелерлек үсүен билгеләп үтте.

Бүген республикада өс һәм аяк киемнәре, синтетик тукымалар җитештерүче 200гә якын предприятие һәм шәхси эшмәкәрләр эшли. 2024 ел нәтиҗәләре буенча тармак ышанычлы үсеш (16 процент) күрсәтте, ә эшләп чыгарылган продукция күләме 14 миллиард сум тәшкил итте. Җиңел сәнәгатьтә 18 меңгә якын кеше хезмәт куя.

«Хөрмәтле коллегалар! Чит ил брендларының бер өлеше китү белән сезнең алда зур мөмкинлекләр ачылды. Әлбәттә, сезгә зур көндәшлек шартларында эшләргә туры килә. Шуңа да карамастан, Татарстан җитештерүчеләре модернизация үткәрә, яңа производстволар ача һәм ел саен продукциянең яңа модельләрен эшләп чыгара, – дип белдерде Коробченко. – Сез - дөньяны яктырак һәм уңайлырак итүче чын иҗатчылар. Эшегез һәрвакыт шатлык китерсен, ә ирешкән уңышларыгыз республика һәм Россия файдасына яңа казанышларга рухландырсын!».

Министр сүзләренчә, республикада яшьләрне тармакка җәлеп итү буенча максатчан эш алып барыла – һөнәри осталык бәйгеләре үткәрелә, эшче һөнәрләрен популярлаштыру юнәлешендәге проектлар гамәлгә ашырыла. Ул Татарстан җиңел сәнәгатенең потенциалы зур булуына ышаныч белдерде.

«Хезмәтегез һәм Татарстан индустриясе үсешенә керткән өлешегез өчен рәхмәт! «Татарстанда эшләнгән» бренды алга таба да көчле һәм горур яңгырасын! Сезгә һәм якыннарыгызга нык сәламәтлек, иминлек телим! Бәйрәм белән!» - дип сүзен төгәлләде Олег Коробченко.