Путин социаль хезмәткәрләрне һөнәри бәйрәмнәре белән котлады
Россия Президенты Владимир Путин социаль яклау өлкәсе белгечләрен Социаль хезмәткәрләр көне белән котлады. Мөрәҗәгатендә ул Россия җәмгыятендә ныгып урнашкан шәфкатьлелек һәм мохтаҗларга ярдәм итү традицияләренең әһәмиятен искәртте. Котлауның тулы тексты Кремль сайтында урнаштырылган.
Дәүләт башлыгы Петр І тарафыннан 1701 елның 8 июнендә кабул ителгән авырулар һәм картларны карау учреждениеләрен ачу турындагы указның илдә социаль ярдәм системасын торгызуда мөһим этап булуын искәртте. Әлеге документ Россиядә дәүләт социаль яклау системасын формалаштыруның башлангычы булды.
«Социаль хезмәткәрләрнең хәзерге буыны сайлаган эшкә намуслы хезмәт итү идеалларын лаеклы рәвештә дәвам итә һәм моңа сөенми мөмкин түгел. Сез ветераннар йортлары һәм интернатларда, гаилә һәм балаларга ярдәм итү үзәкләрендә, социаль өлкәнең башка оешмаларында хезмәт куясыз», - дип белдерде Путин.
Аның сүзләренчә, миллионлаган гражданнарның көндәлек проблемаларын хәл итү нәкъ менә аларның һөнәри осталыгына, ярдәмчеллегенә һәм фидакарьлегенә бәйле.
«Социаль хезмәтләрнең сыйфатын, оперативлыгын һәм үтемлелеген даими рәвештә арттыру, Россия һәм чит илләрнең алдынгы тәҗрибәсен активрак файдалану, бу юнәлештә дәүләт, үсеш институтлары, коммерцияле булмаган оешмалар, бизнес, волонтерлык оешмаларының тырышлыкларын берләштерү мөһим», – дип өстәде Россия Президенты.
Владимир Путин сүзенең ахырында социаль яклау өлкәсе белгечләренә хезмәтләре өчен рәхмәт белдерде һәм алдагы эшләрендә уңышлар теләде.