Нуну Мендеш: Ямал ва Дембеле — “Олтин тўп”га муносиб рақиблар
0
22 ёшли чап қанот ҳимоячиси Миллатлар лигасининг финалида Испания термасига қарши ўйинда ажойиб ҳаракатлари билан эътибор марказида бўлди ва беллашувнинг энг яхши футболчиси деб топилди. Хусусан, у ушбу баҳсда Испаниянинг ёш юлдузи Ламин Ямалга қарши самарали ва тажрибали ўйин кўрсатди.
Матбуот анжуманида ундан Ямал ва Дембеле ўртасидаги “Олтин тўп” учун кураш ҳақида сўрашди. Мендеш эса бундай жавоб берди:
“Ямал ва Дембеле ҳақида алоҳида гапириш қийин, чунки иккаласи ҳам юқори даражадаги футболчилар. Усмон билан бирга ПСЖда ҳаракат қилганман. У нафақат жуда яхши ўйинчи, балки инсон сифатида ҳам жуда самимий ва меҳнатсевар. Унинг салоҳияти ҳақиқий чемпионларга хос.
Ламин эса ёш бўлишига қарамай, фантастик мавсум ўтказди. Унинг ўйинларини кузатиш завқ бағишлайди. У келажакнинг юлдузи,” — деди Мендеш.
Футболчи сўзини шундай давом эттирди:
“Дембеле “Барселона”да бўлганида кўп жароҳатлардан азият чекканди. ПСЖда эса ўзини янги босқичда кўрсата бошлади. Мен унга “Олтин тўп”ни ютушини тилайман ва, имконим бўлса, бу мақсадга етишида ёрдам беришга тайёрман,” — деб таъкидлади у.
Маълумот учун, ПСЖ 2024/25 йилги мавсумда тарихий натижаларга эришди. Парижликлар Лига 1 чемпионлигини қўлга киритди, Франция кубогини ютиб олди ва энг муҳими — Европа Чемпионлар Лигасида ғолиб чиқди. Бу натижалар Дембелега “Олтин тўп” учун жиддий даъвогар сифатида қараш имконини яратмоқда.
Шу билан бирга, Ламин Ямал ҳам “Барселона” сафида ва Испания терма жамоасидаги ўйинлари орқали нафақат мухлислар, балки мутахассислар эътирофига ҳам сазовор бўлмоқда. Ундан келажакда кўп нарсалар кутилмоқда.
“Олтин тўп” атрофидаги кураш ҳар йили қизғин кечади, лекин бу йил ёш ва иқтидорли номзодлар ўртасида бўлиши кутилмоқда. Мендешнинг дипломатик ва самимий фикрлари эса бу жараёнда спорт руҳи ва жамоавий дўстлик қандай муҳим эканини яна бир бор намоён этди.