Гвардиола: "Ювентус" – Италиядаги энг таъсирли клуб!

"Манчестер Сити" бош мураббийи Хосеп Гвардиола Клублар ўртасидаги Жаҳон чемпионатида "Ювентус"га қарши бўлиб ўтадиган муҳим тўқнашув олдидан ўз фикрларини баён қилди. У рақиб жамоани юқори баҳолар экан, туринликлар билан бўладиган ўйинни жуда интиқлик билан кутaётганини таъкидлади.

"Биз жорий мавсумда "Ювентус" билан аллақачон ўйин ўтказганмиз ва ўша сафар Туринда мағлубиятга учраганмиз. Энди эса уларнинг бошқарувида янги мураббий. Бу жамоа Италиянинг асосий гранд клуби, эҳтимол Европада эмас, аммо Италияда шубҳасиз энг оммавий ва таъсирли жамоа ҳисобланади", — деди Гвардиола Mediaset нашрига берган интервьюсида.

Гвардиоланинг таъкидлашича, гуруҳдаги биринчи ўрин тақдири айнан шу беллашувда ҳал бўлади. "Ювентус" нафақат тарихий тажрибаси, балки ҳозирги кундаги шакли ва мураббийлик штабининг янгиланиши билан ҳам жиддий рақиб ҳисобланади.

"Мен шахсан уларга қарши яна майдонга тушишни сабрсизлик билан кутяпман. Бу ўйин нафақат натижа, балки ҳар икки жамоа учун муҳим синов ҳам бўлади", – деди испаниялик мутахассис.

Маълумот учун, "Манчестер Сити" ва "Ювентус" ўртасидаги тўқнашув 26 июнь куни Тошкент вақти билан соат 00:00 да бошланади. Беллашув Клублар ўртасидаги Жаҳон чемпионати гуруҳ босқичидаги ҳал қилувчи баҳслардан бири сифатида катта қизиқиш уйғотмоқда.

"Ювентус" сўнгги пайтларда шакли юқори бўлган жамоалардан бири сифатида кўрилмоқда. Уларнинг янги мураббийи остидаги тактик ёндашув ва футболчиларнинг бир-бирига уйғунлашган ҳаракатлари "Сити"ни жиддий синов кутaётганини англатади.

Шунингдек, Гвардиоланинг фикрлари шундан далолат берадики, у бу рақибга ҳурмат билан ёндошади ва беллашувда енгил ғалабага умид боғламайди. Аксинча, жамоаси жисмонан ҳам, руҳий жиҳатдан ҳам ушбу учрашувга пухта тайёргарлик кўриши кераклигини яхши англаб турибди.

Ўйиннинг аҳамияти шундаки, бу нафақат Клублар ўртасидаги жаҳон чемпионатидаги гуруҳ босқичи учун муҳим, балки икки топ жамоа ва мураббийлар ўртасидаги тажриба, стратегия ва ирода тўқнашуви сифатида ҳам алоҳида аҳамиятга эга.

Мухлислар эса бутун дунё бўйлаб ушбу ўйинни катта интиқлик билан кутмоқда. Чунки икки гранд жамоа ўртасидаги беллашув доим эсда қоладиган лаҳзалар, драматик вазиятлар ва юқори даражадаги футбол томошасини тақдим этиши аниқ.