Қарағандыдағы ауруханада дәрігерлер соққыға жығылған: күдікті қамауға алынды
38 жастағы ер адам Қарағанды облыстық балалар ауруханасында екі дәрігерге шабуыл жасағаннан кейін екі айға қамауға алынды, - деп хабарлайды Tengrinews.kz тілшісі.
Бұл туралы Қарағанды облысы ПД баспасөз қызметі хабарлады.
"Күдікті сот санкциясымен екі айға қамауға алынды. Тергеу жалғасып жатыр", – делінген полиция хабарламасында.
Айта кетейік, оқиға 12 маусымда болған. 38 жастағы ер адам баласын қаратуға алып келіп, қабылдау кезінде дәрігерлерді соққыға жыққаны хабарланған болатын. Полицияны олардың әріптестері шақырған. Медициналық қызметкерлерге күш қолдану бабы бойынша қылмыстық іс қозғалды.
Зардап шеккен дәрігерлер қазір облыстық аурухананың шұғыл нейрохирургия бөлімінде ем қабылдап жатыр. Олардың жағдайы орташа ауыр деп бағаланған. Диагнозы: мидың шайқалуы, мұрынның сынуы, көптеген көгерулер мен гематомалар.
Бұған дейін денсаулық сақтау министрі Ақмарал Әлназарова ауруханаға барып, дәрігерлердің жағдайларын білді.
Сілтемесіз жаңалық оқисыз ба? Онда Telegram желісінде парақшамызға тіркеліңіз!