КўЖЧда ўзбек ҳакамлари: Илғор ўйинлар ва бурчакда Ильгиз Танташев
Гуруҳ босқичининг сўнгги ўйинларидан бири — “C” гуруҳи доирасида “Бока Хуниорс” ҳамда “Бенфика” жамоалари ўртасидаги драматик тўқнашув бўлди. Бу икки гранд клуб ўртасидаги учрашув кескин ва муросасиз тарзда кечиб, 2:2 ҳисобида дуранг билан якунланди. Мексикалик бош ҳакам Сесар Рамос томонидан ўйин давомида 3 та қизил карточка кўрсатилгани беллашувнинг қай даражада кескин бўлганидан далолат беради.
Натижада, кечаги йирик ғалаба эвазига “Бавария” 3 очко билан “C” гуруҳи пешқадамига айланди. “Бока Хуниорс” ва “Бенфика” эса дуранг натижаси эвазига 1 тадан очко йиғиб, 2-3 ўринни бўлишиб турибди. “Окленд Сити” эса ҳозирча очкосиз қолмоқда.
“D” гуруҳида ҳам катта қизиқиш уйғотган ўйинлар бўлиб ўтди. “Челси” “Лос-Анжелес” устидан 2:0 ҳисобида ишончли ғалаба қозонган бўлса, “Фламенго” ҳам “Эсперанс”ни худди шу ҳисобда мағлуб этди. Ҳар икки ғолиб жамоа 3 очкодан жамғарган ҳолда 1-2 ўринларда қайд этилди.
Бугун, 17 июнь куни футбол ишқибозлари учун яна бир муҳим баҳс — “F” гуруҳидан ўрин олган “Флуминенсе” – “Боруссия Дортмунд” учрашуви бўлиб ўтади. Беллашув соат 21:00 да старт олади ва уни ўзбекистонлик тажрибали ҳакам Ильгиз Танташев бошқаради. Унга қанотларда Андрей Цапенко ва Тимур Гайнуллин ёрдам беради. Бу нафақат ҳакам учун, балки юртимиз футбол ҳакамчилиги учун ҳам юксак даражадаги тажриба саналади.
Гуруҳнинг иккинчи ўйини — “Ульсан” ва “Мамелоди Сандаунз” жамоалари ўртасида 18 июнь куни соат 03:00 да бошланади.
Эртанги кун, 18 июн, ҳам ўзгача аҳамиятга эга. “E” гуруҳида “Ривер Плейт” – “Урава Ред Даймондс” (00:00), “Монтеррей” – “Интер” (06:00) учрашувлари ўтказилади. “G” гуруҳида эса юртимиз вакили Абдуқодир Ҳусанов жамоаси — “Манчестер Сити” “Видад” клубига қарши майдонга тушади. Бу беллашув ҳам соат 21:00 да старт олади.
Ҳар бир учрашув нафақат очколар, балки келажакдаги плей-офф масаласида ҳал қилувчи аҳамиятга эга бўлиб, чемпионатнинг қай даражада кескин ва интригага бой кечаётганини кўрсатиб турибди.