Роналду Трампга дастхати туширилган либосини совға қилди

Португалия футболи афсонаси, беш карра "Олтин тўп" соҳиби Криштиану Роналдунинг юракдан чиққан табриги АҚШда катта шов-шувга сабаб бўлди. У ўзининг шахсий имзоси туширилган ва махсус ёзув билан безатилган Португалия терма жамоаси футболкасини АҚШ президенти Дональд Трампга совға қилди.

Мазкур эсдалик совғаси Трампга Европа кенгаши президенти Антониу Кошта орқали топширилди. АҚШ президентининг алоқа бўйича маслаҳатчиси Марго Мартиннинг маълум қилишича, совға Трамп томонидан самимийлик билан қабул қилинган.

Қизил рангдаги футболкада Роналдунинг машҳур рақами — 7 рақами ва унинг шахсий имзоси ёзилган. Энг муҳим жиҳати — футболкадаги шундай ёзув бўлди:

"To President Donald J. Trump – Playing for peace"
(Тинчлик учун ҳаракат қилаётган Президент Дональд Трампга)

Бу ибора нафақат Роналдунинг шахсий муносабатини, балки унинг глобал тинчлик ва ҳамкорлик йўлидаги қўллаб-қувватловини ҳам ифода этган. Ҳозирги геосиёсий воқеликда бундай рамзий ҳаракатлар эътибор марказида бўлиб қолмоқда.

Футбол орқали инсониятни бирлаштириш ғояси бугун жаҳонда жуда муҳим. Спорт дипломатияси сўнги йилларда сиёсий алоқаларда ҳам ўз таъсирини кўрсата бошлади. Криштиану Роналдунинг бу каби эзгу ишораси ана шундай таҳсинга лойиқ ҳолатлардан бири бўлди.

Таъкидлаш жоиз, Дональд Трамп ҳам ўз нутқларида тинчлик ташаббусларини қўллаб-қувватлашини билдирган. Шу боис, Роналдунинг бу совғаси нафақат футбол, балки сиёсий аҳамиятга ҳам эга.

Футбол ва сиёсат дунё саҳнасида яна бир бора кесишди. Ва бу сафар тинчлик ва дўстликни қўллаб-қувватлаш рамзида.