Теҳронда қон тўкилмоқда: касалхоналар жабрланганлар билан тўлиб кетди

Эрон пойтахти Теҳрондаги Имом Ҳумайний шифохонаси сўнгги кунларда ҳақиқий фронт нуқтасига айланди. 15 июндан буён шошилинч ёрдам бўлимларида ҳолат изидан ҳолат қайд этилмоқда — Эрон ва Исроил ўртасидаги ҳарбий тўқнашувлар шифохоналардаги тинчликни парчалади.

Тиббиёт ходимлари буни “қонли қирғин” деб таърифламоқда. Ярадорлар оқими тўхтамаяпти, бўлимларда жой етишмайди, ходимлар эса тинимсиз хизматда. Тез ёрдам шифокорларидан бири ҳолатни шундай тасвирлади:

“Бино ичида дод-вой, қаттиқ овоз ва қонли манзара ҳукмрон. Ҳаёт учун курашаётганлар ва жасадлар бир вақтнинг ўзида келтирилмоқда”.

Энг ёмон томони — жароҳатланганлар орасида болалар, ўсмирлар, қариялар ҳам бор. Айрим ҳолатларда она боласини қутқариш учун келса, ўзининг ҳам жароҳатланганини кеч билиб қолмоқда. Баъзи беморларда металл парчалари суяк ва юмшоқ тўқималарга кириб кетган, бошқалар ички қон кетиши ёки оғир куйишлар билан келтирилган.

Эрон соғлиқни сақлаш вазирлиги маълумотига кўра, 16 июн куни мамлакат бўйлаб 1277 киши касалхонага ётқизилган, уларнинг 224 нафари ҳаётдан кўз юмган. Яна даҳшатли маълумот — қурбонларнинг 90 фоиздан зиёди тинч аҳоли вакиллари.

Бир шифокор таъкидлаганидек, расмий рақамлар аслида воқеликни тўлиқ акс эттирмайди. Теҳрондаги Ҳумайний шифохонасида енгил жароҳатланганлар бошқа клиникаларга ўтказилаётган бир пайтда, реанимация бўлимидаги ҳолат янада оғир. Беморлар сони ва қурбонлар ҳақидаги аниқ маълумотларни жамоатчиликка ошкор қилмаслик буйруғи берилган.

Журналистларнинг сўровларига ҳам ҳукумат расмийлари жавоб беришдан бош тортмоқда. Ваҳоланки, воқеалар таҳлилига кўра, ҳар бир соатда янги жароҳатланганлар келиб тушмоқда ва шифохоналардаги вазият кундан кунга кескинлашмоқда.

Эрон–Исроил тўқнашуви нафақат ҳарбий фронтда, балки касалхоналарда ҳам қурбонлар изини қолдирмоқда. Теҳрон шифохоналаридаги фожеа инсоний фожианинг тирик гувоҳи бўлиб қолмоқда.