Ұлытау облысы шағын және орта бизнесті дамытуда көшбасшылық позициясын нығайтты
2025 жылдың І тоқсаны бойынша "Атамекен" Ұлттық кәсіпкерлер палатасы жүргізетін "Іскерлік климат" рейтингінде Ұлытау облысы жоғары нәтижеге қол жеткізді. Бұл ретте өткен жылдың қорытындысы бойынша да өңір көшбасшылар қатарында болғанын атап өткен жөн. Осылайша, көрсеткіштер өңірде кәсіпкерлікті дамыту бағытында жүргізіліп жатқан саясаттың жүйелілігі мен тиімділігін дәлелдейді.
Өңір кәсіпкерлері тарапынан мемлекеттік қолдау құралдарының ашықтығы мен тиімділігіне оң баға берілуде. Сонымен қатар, бизнестің ұсыныстары мен қажеттіліктерін ескере отырып, шешім қабылдау тәжірибесі дамып келеді.
Атап айтқанда, шағын бизнесті дамыту және мемлекеттік қолдау шараларының қолжетімділігі бойынша облыс Қазақстанда 1-орынға ие болды. Сондай-ақ, мемлекеттік органдармен мәселелерді шешуде бейресми тәсілдерге тәуелділік деңгейі салыстырмалы түрде төмен екені байқалады.
Орта бизнес бойынша да айтарлықтай ілгерілеу бар: егер 2024 жылы облыс 15-орында болса, 2025 жылдың І тоқсанында 8-орынға көтерілді. Бұл — өңірде кәсіпкерлік инфрақұрылымның нығайып, орта бизнес үшін қолайлы жағдайлар қалыптасып жатқанын көрсететін маңызды жетістік.