Сунъий интеллект қидирувни ўзгартирмоқда: сайтлар янги таҳдид остида

Сўнгги йилларда интернетда маълумот излаш тарзи тубдан ўзгариб бормоқда. Илгарилаб келган Google қидирув тизими ва унга боғлиқ бўлган веб-сайтлар энди янги рақобатга дуч келмоқда — сунъий интеллект воситалари. ChatGPT, Perplexity ва бошқа AI-ассистентлар инсоннинг ахборотга эга бўлиш тарзини ўзгартириб, ўзига хос рақобат муҳитини ярата бошлади. Бу ҳақда WCCF TECH манбасига таянилган ҳолда inbusiness.kz хабар тарқатди.

Техник ҳамжамият ва интернет таҳлилчилари сунъий интеллект тизимларининг асосий ахборот манбасига айланиб бораётганини алоҳида қайд этмоқда. Илгари веб-сайтлар ўзларининг барча трафиги ва даромадини асосан Google қидируви орқали шакллантирган бўлса, энди фойдаланувчилар кўпинча сунъий интеллект платформаларига мурожаат қиляпти. Айнан шунинг учун сайёҳлик порталлари, ахборот агентликлари ва турли янгилик сайтлари сўнгги ойларда аудитория ва даромадларни сезиларли йўқотмоқда. Бу эса ишчи ўринларининг қисқариши ва бизнес моделларнинг тубдан қайта кўриб чиқилишига олиб келмоқда.

Google ўз навбатида сунъий интеллект йўналишига катта сармоя йўналтираётган бўлса-да, қидирув тизимларига бўлган анъанавий ишонч аста-секин сусаймоқда. Фойдаланувчилар энди маълумот олишда кўплаб сайтлардан фойдаланиш ўрнига, ChatGPT, Perplexity ва уларнинг аналоглари каби AI ёрдамчилари орқали тўғридан-тўғри аниқ ва тез жавоб олишни афзал кўришмоқда. Бу эса сайтлар учун янги таҳдидлар ва глобал рақобат шароити яратади.

Бугунги кунда кўплаб компаниялар янги шароитларга мослашиш учун ўзларининг сунъий интеллект ечимларини яратиш, мавжуд даромад моделларини диверсификация қилиш ва интерактив контентга эътиборни кучайтиришга мажбур. Янги технологиялар эса онлайн-бизнес соҳасида ғоя ва стратегияларни тубдан янгилашни талаб этмоқда.

Ахборот излашдаги инқилобий ўзгаришлар натижасида, веб-трафик учун кураш янги босқичга чиқди. Таҳлилчилар фикрича, сунъий интеллект воситалари ахборотга эга бўлишда тезлик, аниқлик ва қулайлик бераётгани сабабли, анъанавий сайтлар рақобатни кучайтириш ёки ҳеч бўлмаса ўз аудиториясини сақлаб қолиш учун инновацион ечимлар топишига тўғри келади.