Махсус операциядә хезмәт итүче Зәй хәрбие «Батырлык өчен» медале белән бүләкләнде
Зәй хәрбие Айрат Габбасов (ул иптәшләре арасында Чыңгыз кушаматы белән билгеле) «Батырлык өчен» медале белән бүләкләнде. Ул әти-әнисенә әлеге бүләк турында дүртенче тапкыр яраланганнан соң хәзер дәвалана торган госпитальдән хәбәр итте.
Айрат Россия Саклану министрлыгы белән 2022 елның ноябрендә контракт төзи. Махсус хәрби операциядә катнашуның беренче көннәреннән үк үзен ышанычлы һәм кыю сугышчы буларак күрсәтә.
Июнь башында аның әти-әнисе – Зөһрә һәм Ринат Габбасовларга да часть командиры исеменнән Рәхмәт хаты тапшырдылар. Тантаналы чара Зәй районы башлыгы Рәзиф Кәримов катнашында узды. Хатта Айратның батырлыгы (аны Бөек Ватан сугышы солдатларының каһарманлыгы белән чагыштыралар) аерым билгеләп үтелә.
«Нәкъ менә шундый холыклы кешеләр ярдәмендә безнең ветераннар Бөек Ватан сугышы елларында фашистлар армиясен тар-мар итте, димәк, без дә нацизмның яңадан баш калкытуын туктата алачакбыз! Айрат безнең белән бергә хезмәт иткән һәм үзенең хәрби бурычы белән Җиңүне якынайткан өчен Сезгә рәхмәт белдерәбез!», - диелә Рәхмәт хатында.
Әти-әнисе әйтүенчә, Айрат һәрвакыт үз сүзендә нык торган. Һәм махсус хәрби операциядә катнашу турындагы карары да искәрмә булмаган.
«Ул Ватан сагына басарга карар кылды, ә безгә аны хупларга гына калды. Улыбыз белән бик тә горурланабыз», - дип сөйләде алар.
Материал Айгөл Яруллина катнашында әзерләнде