Пекинда илк инсонсимон роботлар дўкони: технология янги даври бошланмоқда

Пекинда жаҳон миқёсида биринчи инсонсимон (гуманоид) роботларга ихтисослашган дўкон эшикларини очиш арафасида турибди. Унда фақат сотиб олиш эмас, балки ҳар бир робот имкониятларини шахсан синаб кўриш мумкин бўлади. Лойиҳа муаллифлари роботлар сотувидан ташқари техник хизмат кўрсатишни ҳам йўлга қўйишини маълум қилган.

Августда ишга тушиши кутилмоқда бўлган ушбу дўкон – футуризм ҳақиқатга айланаётганини намоён этувчи муҳим қадам. Демо-зонада мижозлар роботлар билан бевосита мулоқотда бўлиб, уларнинг ҳаракатланиши, ақл-заковати ва турли вазифаларни бажариш қобилиятини ўз кўзлари билан кузатиши мумкин бўлади.

Лойиҳага дунё бўйлаб 30 дан ортиқ ишлаб чиқарувчилар қўшилган. Улар орасида Zeekr автокомпанияси учун инсонсимон роботлар тайёрлаётган UBTech каби илғор стартаплар ҳам бор. Бу эса дўконда турли модель ва вазифаларга эга роботлар тақдим этилишини англатади.

Инсонсимон роботлар – бу нафақат келажак технологиялари, балки кундалик ҳаётимизни енгиллаштиришга қаратилган амалий ечимлардир. Хизмат кўрсатиш, логистика, таълим, ҳатто хонадондаги ёрдамчи вазифаларини бажарувчи роботлар энди ҳақиқий бозор иштирокчиларига айланмоқда.

Мутасаддилар таъкидлашича, ушбу дўкон нафақат сотув нуқтаси, балки инновацион марказ сифатида ҳам фаолият юритади. Роботлар соҳасидаги янги ишланмалар ва тест жараёнлари ҳам шу ерда амалга оширилади.

Якуний сўз ўрнида шуни айтиш мумкинки, Пекиндаги ушбу ташаббус глобал робототехника саноатида янги босқични бошлаб бериши мумкин. Илм-фан ва амалиётнинг ушбу уйғунлиги инсониятни интеллектуал машиналар даврига янада яқинлаштирмоқда.