Парижда хавфли “шарли фитна”: Макронга ҳужум режаси фош этилди

Франция пойтахтида жуда ғайриоддий ва хавфли қўпорувчилик уриниши олди олинди. Париж полицияси Ле-Буржедаги нуфузли авиасалон тадбирига халақит беришни мақсад қилган етти нафар ўта сўл фаолни қўлга олди.

Мазкур фаоллар авиасалонни бузиш учун ғаройиб ва бир пайтнинг ўзида хавфли усулни танлашган — юзлаб гелий шарлардан фойдаланиш орқали ҳаво маконида халал келтириш.

Тергов маълумотларига кўра, фаоллардан мусодара қилинган жиҳозлар орасида 200 га яқин шар ва махсус гелий балонлари топилган. Уларнинг режаси икки босқичда амалга оширилиши керак эди. Биринчи уриниш жума куни, авиасалон кенг жамоатчилик учун очилганда амалга оширилиши лозим бўлган. Бу пайтда Франция президенти Эммануэл Макрон ҳам тадбирга ташриф буюриши кутилган эди. Аммо у G7 саммити муносабати билан Канадада бўлгани сабаб, биринчи уриниш амалга ошмай қолди.

Иккинчи ҳаракат шанба куни тушдан кейин режалаштирилган бўлиб, шарлар орқали ҳаво маконини муваққат блоклаш кўзда тутилган. Лекин Франция ички ишлар органлари ўз вақтида кетаётган ҳаракатларни фош этиб, гумонланувчиларни 20 ва 21 июн кунлари ҳибсга олишга муваффақ бўлди.

Маълумотларга кўра, ушбу фаоллар авиасалонда Исроил ҳарбий компанияларининг иштирок этишига қарши чиққанлар. Улар буни ўз нуқтаи назарларини намоён этишнинг таъсирчан йўли деб билганлар.

Айни вақтда гумонланувчилар қамоқда сақланмоқда ва Франция қонунчилигига мувофиқ улар “ҳаво макони ва учувчи техникалар ҳаракатига хавф туғдириш” моддаси бўйича айбланишлари мумкин.

Бу воқеа мамлакат хавфсизлик тизимининг фаоллиги ва қаттиқ назорати туфайли жиддий оқибатларнинг олди олинганини кўрсатади. Аммо бу каби фитналарнинг ортида турган кучлар ва уларнинг мақсадлари жамоатчиликда хавотир уйғотишда давом этмоқда.