Неге тарифтер қымбаттап жатыр, бірақ сапасы төмен? Министр жауабы

Цифрлық даму, инновациялар және аэроғарыш өнеркәсібі министрі Жаслан Мәдиевтен ұялы байланыс операторлары тарифтерді көтеріп жатқанына қарамастан байланыс сапасы неге жақсармайтыны сұралды, - деп хабарлайды Tengrinews.kz тілшісі.
"Қазақстандықтар байланыс сапасына шағымданып жатыр. Осыған қарамастан ұялы байланыс операторлары тарифтерді көтеріп, ол жайлы тек хабар жіберіп отыр. Неге тарифтер өскенде байланыс сапасы жақсармайды?" – деп сұрады Tengrinews.kz тілшісі.
Жаслан Мәдиев байланыс сапасындағы мәселелер "кейде" ақ дақтарға байланысты туындайтынын айтты.

"Себептері – жаңа аудандардың пайда болуы, қаланың кеңеюі, белсенді құрылыс, жаңа ғимараттардың салынуы. Ұялы байланыс операторлары базалық станцияларды орнату, электр энергиясын тарту, антенна-мачталық құрылыстар салу мәселелерін жедел шешуі керек. Бұл біраз уақыт алады. Егер шағымдар болса, азаматтар e-otinish жүйесі арқылы жүгінеді. Біз әрекет етеміз, тексереміз, нұсқама береміз. Орындамаса – айыппұл саламыз", – деді министр.

Оның айтуынша, бұл бағыттағы жұмыстар тұрақты түрде жүргізіледі, өйткені министрлік "азаматтар үшін байланыс сапасын үнемі жақсартуға" ниетті.

"Біз оларды (операторларды – еск.) бақылап отырамыз, бізде радиожиіліктер қызметі бар, ол (байланыс сапасын – еск.) өлшейді. Минималды шекті мәнге, секундтағы мегабиттер санына, байланыс сапасына қатысты нормативтік талаптар бар. Олар бұзылса – шара қолданамыз. Айыппұлдар бойынша үнемі қатаңдату жұмыстарын жүргізіп отырмыз, нормативтік-құқықтық актілерге – 3-5 есе арттыруды енгізіп жатырмыз. Қазір осы бағытта жұмыс істеп жатырмыз", – деп қосты министр.

Сілтемесіз жаңалық оқисыз ба? Онда Telegram желісінде парақшамызға тіркеліңіз!