Алабуга районы башлыгы талантлы укучыларны стипендияләр белән бүләкләде
Алабуга районы башлыгы талантлы укучыларны стипендияләр белән бүләкләде. Гомумшәһәр планеркасында төрле дәрәҗәдәге олимпиадаларда җиңгән һәм призер булган укучыларга Алабуга районы башлыгы стипендияләре тапшырылды. Бу хакта «Алабуга нуры» яза.
Бүләкләнүчеләр арасында:
Евгения Вассанова, «Адымнар — Алабуга» полилингваль комплексының 10 нчы сыйныф укучысы, 24 мең сумлык сертификат алды. Ул тарих буенча Бөтенроссия олимпиадасының төбәк этабында җиңеп, җәмгыять белеме һәм рус теле буенча призер булды.
Билал Сәгыйтов, 1 нче гимназиянең унынчы сыйныф укучысы, 15 мең сумлык сертификат ады. Ул география буенча Бөтенроссия олимпиадасының төбәк этабында, шулай ук Татарстан геологиясе һәм тарихы буенча республика олимпиадаларының йомгаклау этабында яхшы нәтиҗәләр күрсәтте.
Валерия Архипова, «Адымнар — Алабуга» комплексының сигезенче сыйныф укучысы һәм 10 нчы лицейның унберенче сыйныф укучысы Муса Дульмиев 10шар мең сум акча алдылар. Валерия инглиз теленнән олимпиадаларда, ә Муса физика һәм информатикада яхшы белемнәр күрсәтә.
Зәлинә Латыйпова, «Университет» мәктәбенең җиденче сыйныф укучысы технология буенча республика олимпиадасында җиңгән өчен 6 мең сумлык сертификатка ия булды.