Telegram орқали гиёҳванд сотган 5 нафар шахс қўлга олинди

Давлат хавфсизлик хизмати маълум қилишича, Тошкент вилояти Оҳангарон шаҳрида тезкор тадбир ўтказилди, деб Давлат хавфсизлик хизмати хабар берди.

Унда Тошкент шаҳри Янгиҳаёт туманида ижарада яшаб, “Телеграм” мессенжери орқали гиёҳванд моддалар савдосини амалга ошираётган наркодўконнинг 5 нафар аъзоси қўлга олинди.

Улар 400 грамм “Альфа-ПВП” синтетик наркотик моддасини 0,3 граммдан қадоқлаган ҳолда, Андижон вилоятидаги мижозларга етказиш мақсадида олиб кетаётган пайтда ушланган.

Қўлга олинганлар кўрсатмасига асосан, улар томонидан Андижон вилоятидаги 53 та яширин жойга жойлаштирилган, ҳар бири 0,3 грамм бўлган “Альфа-ПВП” моддаси мусодара қилинди.

Тадбир давомида наркодўконнинг Андижон вилояти Избоскан туманида яшовчи, 2003 йил туғилган оператори ҳам Янгиҳаёт туманида ушланди. Унинг автомобилидан 986 грамм гашиш ва 7 кг “Альфа-ПВП” моддаси аниқланди.

Маълум бўлишича, ушбу наркогуруҳ контрабанда йўли билан олиб кирилган гиёҳванд моддаларни Тошкент шаҳри ҳамда Тошкент, Андижон, Фарғона, Наманган, Самарқанд ва Бухоро вилоятларида тарқатиш билан шуғулланиб келган.

Ҳозирда барча қўлга олинган шахсларга нисбатан Жиноят кодексининг 25,273-моддаси 5-қисми билан жиноят иши қўзғатилиб, қамоққа олиш эҳтиёт чораси қўлланилган. Тергов ҳаракатлари олиб борилмоқда.