Месси ПСЖдан учралган мағлубият ҳақида нималар деди?

Клублар ўртасидаги жаҳон чемпионати доирасида "Интер Майами" жамоаси ПСЖга қарши ўйинда йирик мағлубиятга учради. Ушбу натижадан сўнг жамоа сардори, афсонавий ҳужумчи Лионель Месси матбуотга ўз муносабатини билдирди.

Месси рақиб жамоанинг салоҳиятини юқори баҳолади ва бу мағлубият тасодиф эмаслигини алоҳида таъкидлади. Унинг сўзларига кўра, ПСЖ жаҳон футболидаги энг кучли клублардан бири эканини яна бир бор намоён қилди.

— Улар жуда кучли ва жипс жамоа. ЕЧЛнинг амалдаги чемпиони эканликлари ҳам буни тасдиқлайди. Биз майдонда бор кучимизни сарфладик, охиригача курашдик. Шахсан мен учун энг муҳими, жамоам ушбу турнирда ўз юзи ва характерини намоён этди. Биз қайсидир маънода яхши таассурот қолдирдик, — деди Лионель Месси.

Шу билан бирга, аргентиналик юлдуз футболчи келажакка ҳам умид билан қараш кераклигини айтди. Унга кўра, бу мағлубият орқали жамоа катта сабоқ олди ва энди навбатдаги мусобақаларда ўз устида янада кўпроқ ишлаши шарт.

— Бизни олдинда яна кўп йирик мусобақалар кутмоқда. Бу мағлубият биз учун бир фурсат — кучлироқ ва тайёрроқ жамоа сифатида майдонга қайта келиш имконияти. Бизда шундай потенциал бор, — дея қўшимча қилди у.

Шу тариқа, "Интер Майами" учун ушбу йирик турнир якунига етди. Аммо клуб раҳбарияти ва футболчилари бундан руҳан синмаганини, балки ўз устида ишлашга тайёр эканини намоён этмоқда.