Хитой бутун шаҳарларни ўчиришга қодир графит қуролини намойиш қилди (видео)

Хитой давлат телевидениеси — CCTV томонидан тақдим этилган сўнгги анимацион видео мамлакат ҳарбий салоҳиятида яна бир бор жиддий ўсиш рўй бераётганини кўрсатди. Ушбу видеолавҳада келтирилишича, Хитой Мудофаа вазирлигига қарашли пудратчи — Хитой аэрокосмик фан ва технология корпорацияси томонидан янги турдаги юқори аниқликдаги қурол яратилган.

Кадрларда ер усти қўнғироқ қурилмасидан учирилаётган ракета тасвирланган бўлиб, у маълум баландликка кўтарилгандан сўнг, 90 тадан ортиқ цилиндрсимон жанговар элементларга бўлиниб кетади. Бу элементлар ерга етиб келганда портлайди ва бир вақтнинг ўзида атмосферага юпқа кимёвий ишлов берилган углерод толалари тарқалади. Бу махсус толалар юқори кучланишдаги электр тармоқларида қисқа туташувни келтириб чиқариш орқали бутун бир ҳудудда кенг кўламли электр ўчишларига сабаб бўлиши мумкин.

South China Morning Post хабарига кўра, ушбу қуролдан фойдаланилганда камида 10 минг квадрат метр майдонда электр таъминоти тўлиқ издан чиқиши мумкин. CCTV бу қуролни “маҳаллий ракеталарнинг сирли тури” сифатида таърифлаган бўлса-да, унинг аниқ номи ёки техник хусусиятлари ошкор этилмади. Аммо экспертлар ушбу қурол “графит бомба” деган тушунчага мос келиши мумкинлигини айтишмоқда.

Маълумки, душманнинг инфратузилмасини, хусусан электр тармоғини фалажлаш — ҳарбий стратегияда кўпдан бери амал қилиб келаётган услубдир. Иккинчи жаҳон уруши даврида Буюк Британия Германияга қарши трослар билан жиҳозланган аэростатлардан фойдаланган. Кейинчалик АҚШ BLU-114/B деб номланган махсус графит снарядни ишлаб чиқди, унда ток ўтказувчи толалардан иборат ғалтаклар жойлаштирилган бўлиб, улкан майдонда қисқа туташувлар ва энергетик фалажликка олиб келган.

Тарихда илк марта графит қуроллари 1991 йилда Ироққа қарши ишлатилган. Ўша пайтда мамлакат умумий электр энергиясининг тахминан 85 фоизидан маҳрум бўлган. Кейинчалик бу турдаги қуроллар 1999 йили Сербияда ва 2003 йилда Кобулда ҳам қўлланган.

Хитойнинг бу ҳаракати нафақат ҳарбий соҳадаги янги қадам сифатида, балки геосиёсий кучлар ўртасидаги рақобатнинг янги босқичи сифатида ҳам баҳоланмоқда. Электр тармоқларини нишонга олиш — бу нафақат ҳужум, балки оммавий фалажланишга олиб келиши мумкин бўлган уруш воситасидир.

Мутахассисларнинг фикрича, бундай қуролларнинг ишлатилиши нафақат ҳарбий объектлар, балки оддий фуқароларнинг ҳаётига ҳам жиддий таъсир кўрсатиши мумкин. Электрсиз қолган шаҳарлар, ишламай қолган шифохоналар, транспорт тизимининг издан чиқиши — буларнинг барчаси бутун бошли ҳудудни фалаж ҳолатга келтириши аниқ.

Бу орқали Хитой дунёга нафақат иқтисодий ва технологик етакчилик даъво қилишаётганини, балки замонавий уруш воситаларини ҳам яратиш борасида жиддий иш олиб бораётганини яна бир бор кўрсатди.