“Барселона” ва Нико Уильямс музокарасида тўхнашув: трансфер хавф остида

"Барселона" клуби жонкуярлари кутган трансферда кутилмаган тўсиқ юзага келди. Каталония грандининг Нико Уильямсни ўз таркибига қўшиш бўйича олиб бораётган музокаралари сўнгги кунларда тўлиқ тўхтаб қолди. Бу ҳолат клуб раҳбариятида жиддий ташвиш ва норозиликка сабаб бўлмоқда, деб ёзади Mundo Deportivo нашри.

Маълум бўлишича, "Барса" ва "Атлетик"нинг ёш қанот ҳужумчиси ўртасида аввал оғзаки келишувга эришилган. Футболчи билан 6 йиллик шартнома ва қониқарли маош масалалари бўйича позициялар мувофиқлаштирилганди. Ҳатто, икки томон ўтган йилдаги келишув шаклига қайтишган. Аммо ушбу келишув расмий ҳужжатларга айлантирилаётган пайтда музокаралар тўхтаган.

Муҳим ҳафта деб баҳоланган ушбу вақт ичида келишувга нуқта қўйилиши керак эди. Бироқ Нико Уильямс томонидан Ла Лигада рўйхатдан ўтишга доир кафолатлар бўйича янги ва мураккаб талаблар қўйилган. Аниқ қилиб айтилса, у клубдан фейр-плей қоидалари асосида ўз номини расмий рўйхатга киритиш бўйича ёзма кафолат талаб қилмоқда. Бу талабни “Барселона” раҳбарияти айни пайтда амалга ошира олмаяпти.

Нико Уильямснинг позицияси, ўз навбатида, клубнинг трансферга бўлган ишончини сўндираётганини таъкидлаш керак. Каталонияликлар ушбу футболчини терма жамоадаги муваффақиятли ўйинлари туфайли жамоага катта умид билан жалб этмоқчи эдилар.

Шунингдек, "Атлетик" клубининг футболчини ушбу ёзда қўйиб юборишга тайёр эмаслиги ҳам вазиятни янада оғирлаштирмоқда. Унга "Бавария" томонидан ҳам қизиқиш борлиги ҳақида маълумотлар тарқалган.

“Барселона” ҳозирча трансфердан расман воз кечмаган, бироқ сўнгги музокаралар клубда оптимизмни камайтиргани аниқ. Агар келгуси кунларда ҳам келишувга эришилмаса, Нико Уильямс "Камп Ноу"га кўчиб ўтиш орзусидан воз кечиши мумкин. Каталония клуби эса яна бир ёш юлдузни қўлдан бой беради.